Қазақстанда макарон өнімдері қымбаттайды
Қазақстандық ірі макарон өндірушілердің бірі шығаратын өнімдердің бағасы шамамен 10%-ға өсуі мүмкін. Бағаның көтерілуінің басты себебі - астық пен ұнның қымбаттауы, деп хабарлайды Egemen.kz.Кәсіпорынның атқарушы директоры Сергей Югайдың айтуынша, соңғы үш жылда Қазақстанда астық пен ұнның бағасы тұрақты өсуде.
- Егер өткен жылы ұнның келісі 130-135 теңге болса, биыл 150 теңгеге жетті. Ұн қымбаттаса, макарон бағасы да өседі. Өнім бағасын көтермесек шығынға батамыз, - деді мән-жайды түсіндірген Сергей Югай.
Оның айтуынша, бағаның өсуіне бұдан бөлек Ресейден жеткізілетін қаптама материалының қымбаттауы және жұмысшылардың жалақысын көтеру қажеттілігі де әсер етеді.
- Жобамен қазан айынан бастап дайын өнімнің бағасын 8-10 пайызға көтеруге тура келеді. Соңғы рет біз макарон өнімдерінің құнын бір жылдан астам уақыт бұрын көтердік, бұл уақыт ішінде ұн бірнеше рет қымбаттады, - деп түсіндірді атқарушы директор.
Сонымен қатар ресейлік өндірушілер де макарон өнімдерінің бағасын 12%-ға қымбаттататынын мәлімдеген. Олар қажет бидай түрінің тапшылығы мен материалдар бағасының күрт өсуіне тап болған.
- Біз өндірісте ресейлік қатты астықты қолданбаймыз, сондықтан көрші елдегі бағаның өсуіне тәуелді емеспіз. Сондай-ақ макарон өнімдерімізді Ресейге жеткізбейміз, өйткені біз осы уақытқа дейін баға деңгейінде ресейліктермен бәсекелесе алмадық. Ал егер олардың өнімдері қымбаттап, біз бәсекеге қабілетті болсақ, мұны да байқап көреміз - дейді Сергей Югай.
