Алғыс айту күні – Адамгершіліктің асыл мерекесі

Алғыс – жүректің нұры, жанның шуағы. Адам баласының бір-біріне деген мейірімі мен ықыласы, ризашылығы мен құрметі – қоғамды біріктіретін ұлы күш. Осындай ізгі қасиеттерді ұлықтайтын ерекше мереке –Алғыс айту күні. Елімізде бұл мереке 1 наурыз күні аталып өтіледі.

Алғыс айту күні алғаш рет 2016 жылы елімізде ресми түрде мереке болып бекітілді. Бұл күннің таңдалуы да тегін емес. 1995 жылдың 1 наурызында Қазақстан халқы Ассамблеясы құрылған болатын. Ассамблея – түрлі этнос өкілдерінің бір шаңырақ астында тату-тәтті өмір сүруінің, бірлік пен келісімнің символы. Сондықтан Алғыс айту күні – еліміздегі барлық ұлт пен ұлыстың бір-біріне, қазақ халқына және кеңпейіл жерге деген ризашылығын білдіретін тағылымды мереке.

Тарих беттеріне үңілсек, қазақ даласы талай тағдырлы кезеңдерді бастан кешті. ХХ ғасырдың зобалаң жылдарында сан түрлі этнос өкілдері қазақ жеріне күштеп қоныс аударылды. Қиын-қыстау заманда жергілікті халық оларды жатсынбай, бауырына басты, барымен бөлісті. Осы мейірім мен жанашырлық – бүгінгі татулықтың алтын діңгегі. Алғыс айту күні – сол бауырмалдыққа тағзым ету, өткенге құрмет көрсету күні.

Бұл мереке – тек тарихи естелік емес, ол – бүгінгі күннің де шынайы құндылығы. Отбасында ата-анаға, ұстазға, досқа, әріптеске ризашылық білдіру – рухани мәдениеттің көрінісі. Бір ауыз жылы сөз, шынайы алғыс адам жүрегін жылытып, үміт сыйлайды.

Ұлы ойшыл Абай Құнанбайұлы адамзат баласын сүйіспеншілік пен адамгершілікке үндеді. Оның тағылымды ойлары алғыс пен рақымның қадірін терең сезінуге жетелейді. Расында да, алғыс айта білу – биік парасаттың белгісі.

Алғыс айту күні – достықтың дәнін себетін, мейірімнің гүлін өсіретін мереке. Әр жүрекке жылу, әр шаңыраққа шаттық сыйлайтын мейірімнің көрінісі. Осындай ризашылық пен құрмет салтанат құрған қоғамда татулық пен береке мәңгі жасай бермек.

         Назерке Маратқызы