ҚР Премьер-Министрі орынбасарының облысқа сапары
Кеше ҚР Премьер-Министрінің орынбасары Ералы Тоғжанов арнайы іссапармен Қызылорда облысына келді. Эпидемиологиялық жағдайдың тұрақталуын қадағалау үшін Сыр өңіріне жасаған сапарын облыс әкімдігі ғимаратында өткен мәжілістен бастаған вице-министр СК-Фармация басшысына облыстың медициналық мекемелерінің дәрі-дәрмекпен бір айлық қоры көлемінде қамтамасыз етілуін ерекше тапсырды.Премьер-Министрдің орынбасары бір апта ішінде облыс мекемелеріне өкпені жасанды желдету аппараттары мен 26 шілдеде қосымша қажетті 200 оттек концентраторы жеткізілетінін хабарлады. Соның нәтижесінде аймақтағы қажеттілікті толықтай қамтамасыз етуге болады. Сонымен қатар Ералы Тоғжанов:
– Күні кеше облыстың кей аудандарында той мен жиындар өткізілген. Дәрі-дәрмекпен, қажетті медициналық көмекпен мемлекет сөзсіз қамтамасыз етуде. Алайда індеттің таралмауы – бұл мемлекеттің ғана қолында емес, бұл істе халықтың да жауапкершілігі мол, – деп, жергілікті халықты санитарлық нормаларды сақтауға шақырды.
Жедел жәрдем станциясының жұмысымен танысу барысында облыс әкімі Гүлшара Әбдіқалықова аймақтағы жедел жәрдем жұмысының мобильді қызметін іске асыруда оң нәтижеге қол жеткізіп, шақыртулар көрсеткіші төмендегенін жеткізді. Мәселен, осындай қиын кезеңде облыс бойынша шақыртулар тәулігіне 2500-ден асып, жүктеме 2 есеге артқан болса, соңғы уақытта шақыртулар 39 пайызға азайып, аймақтағы ахуалдың тұрақтанғандығын көрсетіп отыр.
Ал дәріханалар жұмысын бақылау барысында дәріханалар қоры үнемі сұранысқа ие дәрі-дәрмектермен, дәрумендермен толықтырылып отыратынынан хабардар болды. Қазіргі таңда аймақта 328 дәріхана, дәріхана пункттері фармацевтикалық қызметпен айналысады. Індеттің таралмауына қажетті дәрі-дәрмектердің уақытылы жетуі және бағасының негізсіз көтерілмеуін арнайы мониторингтік топ бақылауда ұстайды.
Іссапар барысында Ералы Тоғжанов мұнан бөлек облыстық көпсалалы емханадағы жағдаймен танысып, індеттің таралуын болдырмау, алдын алу шараларын ұдайы назарда ұстап, болдырмау бағытында бірқатар тапсырмалар берді.
«Толқын» ақпарат
