Мектеп кітапханашыларының жалақысы артады
Былтырдан бастап педагогтердің, мәдениет қызметкерлері ретінде облыстық, қалалық кітапханалар кітапханашыларының жалақысы көбейді. Осыдан кейін екі санатқа да жатқызылмай, әлеуметтік мәртебесі анықталмай келген мектеп кітапханашылары жайнайқайын жеткізді. Олардың үні тиісті орындарға жеткен сыңайлы. Себебі биыл мектеп кітапханашыларының жалақысын арттыру мәселесі шешімін таппақ. Бұл туралы Білім және ғылым министрі Асхат Аймағамбетов жақында өткен министрліктің кеңейтілген алқа отырысында айтты.Қосымша білімнің бала өмірінде, оның адам, маман болып қалыптасуында рөлі зор. Бұл туралы біз бас басылым бетіне «Көлеңкеде қалған қосымша білім» деген тақырыппен шыққан көлемді материалымызда кеңірек жазғанбыз. Білім және ғылым министрлігінің алқа отырысында қосымша білімде атқарылған істер мен алдағы міндеттер туралы айтылды.
«Жақында қабылданған заң шеңберінде қосымша білім алуға кең мүмкіндік беру үшін мемлекеттік тапсырыс орналастырылады. Бұл да конкурс негізінде өтеді. Жекеменшік ұйымдарға орналастырылғаннан кейін қосымша біліммен қамту деңгейін әлдеқайда ұлғайтуға мүмкіндік туатыны сөзсіз. Қосымша білім беру ұйымдарын дамыту бойынша кейбір өңірде біріктіру, оңтайландыру, жабу бойынша бастамалар орын алып жатыр. Мұндай бастамаларды тоқтатып, бұл ұйымдарды жаппай дамытуымыз керек», деді министр.
PISA – Білім алушылардың жетістігін халықаралық бағалау бағдарламасының нәтижелері қазақстандық балалардың оқу сауаттылығы тым төмендеп кеткенін көрсетті. Оқушылардың сауаттылығын арттыруда көркем әдебиет кітаптарын оқудың орны ерек. Ал олардың мектепте кітап оқуға деген қызығушылығын оятатын мамандар елеусіз қалып келді. Осыған дейін біз «Мектеп кітапханашыларының міндеті неге нақтыланбаған?» атты проблемалық мақаламызда 4 жыл педагогикалық оқу орнында оқып маманданған, 20 жылдан бері мектепте балалардың зейінін ашумен айналысып жүрген кәсіп иесінің жарымайтын жалақыға жұмыс істеп жүргенін жазғанбыз. Биыл бұл түйткілдің түйіні тарқатылмақ. Мәселе түбегейлі шешілмегенімен, сең қозғалды деуге болады. Ведомство басшысы А.Аймағамбетов аталған мәселеге қатысты: «Қазіргі уақытта «Оқуға құштар мектеп» жобасын іске қосып жатырмыз. Оның аясында мектептегі кітапханалар қорында мемлекеттік тілдегі көркем әдебиетті айтарлықтай жаңарту міндеті тұр. Сондықтан мұндай мәселені біз биыл шешуіміз керек. Осы ретте біздің кітапханада істейтін әріптестеріміз – кітапханашылардың жалақысын көтеру мәселесі де өте өзекті. Бұл бойынша Мемлекет басшысы тиісті тапсырманы берген болатын. Сондықтан осы жұмысты биыл жалғастырамыз», – деді.
egemen.kz
