AMANAT өкілдері Аққұмда

Мемлекет басшысы Қасым-Жомарт Тоқаев Nur Otan партиясының кезектен тыс съезінде партия атауын AMANAT деп өзгерте отырып "Партия популизмге салынып, орын­далмайтын уәде бермегені жөн. Егер осылай жалғаса бер­се, күдік күшейіп, адамдардың партия­ға деген сенімі жоғалады. Ал оның пар­тияға кері әсері тиеді. Бұндай көзбояу­шылықтың салдары адамдардың әлеуметтік көңіл күйіне және ішкі саяси тұрақтылыққа ықпал етеді. Бұған, әсіресе, геосаяси тұрақсыздық жағдайында жол беруге болмайды. Сайлаушылармен кері байланысты күшейткен жөн және осы бағытта қоғамдық қабылдаулардың әлеуетін барынша пайдалану қажет" деген болатын.

Бұл бағыттағы жұмыстар облыс көлемінде басталып та кетті. Осы аптада ауданға қарасты Аққұм ауылдық округінде "AMANAT" партиясының облыстық филиалы мобильді қоғамдық қабылдау өткізді. Округ орталығындағы Шижаға ауылдық мәдениет үйіне жиналғандардың қарасы өте көп болды. Алдымен сөз сөйлеген облыстық партия филиалының атқарушы хатшысы Ләйлә Төрешова жиналған жұртшылықты "AMANAT" партиясының басты ұстанымы мен алдағы уақытта атқарылатын жоспарларды атап өтті. Сондай-ақ халық пен билік арасындағы байланысты нығайтып, елдің пікіріне, үніне құлақ асатын жаңа Қазақстанды қалыптастыру жолында жасалып отырған осындай тың бастамалардың болашағынан үлкен нәтиже күтетінін жеткізді.

Одан кейін ауыл тұрғындарын Ләйлә Төрешовамен қатар партияның Арал аудандық филиалының атқарушы хатшысы Талғат Қанатов, аудан әкімінің орынбасары Қайрат Әбсұлтанов, облыстық ауыл шаруашылығы басқармасы басшысының орынбасары Қайратбек Сәрсенбаев, облыстық білім басқармасы басшысының орынбасары Әзизбек Ізімбетов, облыстық жұмыспен қамтуды үйлестіру және әлеуметтік бағдарламалар басқарма басшысының орынбасары Мейрамбек Әбдікәрімов, облыстық мәслихат депутаттары Лаура Ибраимова мен Еркебұлан Аяғанов және аудандық мәслихат хатшысы Базарбай Төрахметовтер жеке қабылдап, ұсыныстарын тыңдады.

Қабылдау барысында ауылдағы маңызды мәселелерден бастап, әр сала бойынша тұрғындардың тілегі тыңдалды. Бірі көгілдір отыннан үмітті екенін жеткізсе, бірі мал жайылымдарын суландыру мақсатында қосымша су ұңғымасын сұрады. Мал шаруашылығын дөңгелетіп отырған ауылдықтар үшін бұл ұсыныстың да маңыздылығы орасан зор екені белгілі.

Мұнан бөлек жұмыспен қамту, денсаулық сақтау, білім саласы, жол мен мәдениет, әлеуметтік мәселелер жайлы түрлі пікірлер тыңдалған қабылдауда партия мен басқармалар өкілдері сөз сөйлеп, субсидиялау, тұрғындарыдң әлеуметтік жағдайын жақсарту төңірегінде сөз етті. Қайрат Әбсұлтанов ауданға табан тіреген қонақтарға аудан тұрғындары атынан алғыс айтып, елдегі көптеген сауалдың түйінін алдағы уақытта да бірлесе отырып атқаратындығына сенім білдірді.

Шара соңында ауыл ақсақалдары батасын беріп, ел азаматтарына, AMANAT партиясына деген сенімін білдірді. Жаңа Қазақстанды қалыптастыру жолында халық әрқашан билікті қолдайтынын айтты.

Оңталап ЖОЛДАСОВ