Шәкіртіміз Америкада оқу мүмкіндігіне ие болды

Мұхит асып білім алудың берер мүмкіншілігі көп. "FLEX" бағдарламасының финалисі оқушымыз Қуантқанов Әлішер (жетекшісі Жиенбаева Бану) алдағы оқу жылында Америкада оқу мүмкіндігіне ие болды. Бағдарлама жөнінде аз-кем ақпарат беріп өтейік.

FLEX Future Leaders Exchange (FLEX) – АҚШ Мемлекеттік департаменті басқаратын, орта мектеп оқушыларына (14-18 жас) АҚШ-та бір жыл тегін, бірге тұруға мүмкіндік беретін алмасу бағдарламасы. "FLEX" бағдарламасының негізгі мақсаты – АҚШ азаматтары мен елдер арасындағы өзара түсіністікті жақсарту, ұзақ мерзімді қарым-қатынасты дамыту және нығайту. АҚШ Мемлекеттік департаменті FLEX және басқа бағдарламалар арқылы 50-ден астам елден жоғары сынып оқушыларын оқуға шақыруды қолдайды. 1993 жылы бағдарлама басталғаннан бері, 27 000-нан астам жоғары сынып оқушылары білім алған.

Толықтай АҚШ үкіметінің тарапынан қаржыландырылатын (соның ішінде саяхат, қалталы стипендия және медициналық сақтандыру) бағдарламада финалист оқушы 1 жыл америкалық отбасымен бірге тұрып, америкалық мектепте білім алатын болады.

Үлкен тәуекелге бел буған Әлішерге сәттілік тілейміз. Үлкен додаға қосып, жан-жақты қолдау білдірген жетекшісі Бану апайға алғыс айтамыз. Жат елде жүргенде өз еліңнің құндылықтарын әрдайым биік ұстағайсың!

№220 орта мектеп фейсбук парақшасынан