Күшті мемлекет – мықты институттардан басталады

Мемлекеттің қуаты тек экономикалық көрсеткіштермен немесе материалдық мүмкіндіктермен өлшенбейді. Нағыз мықты мемлекет — ең алдымен, тұрақты әрі тиімді жұмыс істейтін мемлекеттік институттарға сүйенетін мемлекет.
Конституцияда мемлекеттік билік жүйесінің негізгі қағидаттары айқындалып, Президент, Құрылтай, Конституциялық Сот және басқа да мемлекеттік институттардың орны мен өкілеттіктері белгіленеді. Мұндағы басты мақсат — әрбір органның өзіне жүктелген міндетті нақты білуі және сол міндетті орындауға жауап беруі.
Мемлекеттік басқаруда жауапкершіліктің болуы аса маңызды. Өйткені шешім қабылдау құқығы берілген жерде сол шешімнің нәтижесіне жауап беру міндеті де қатар жүруі тиіс. Бұл — тиімді мемлекеттік басқарудың негізгі шарттарының бірі.
Институттар арасындағы өкілеттіктердің нақты бөлінуі бір органның шектен тыс ықпал етуіне жол бермей, мемлекеттік жүйенің тепе-тең әрі тұрақты жұмыс істеуіне мүмкіндік береді.
Президент пен Құрылтайдың бірқатар мемлекеттік органдарға қатысты кадрлық шешімдердегі өзара іс-қимылы да институционалдық жауапкершіліктің маңызды тетігі ретінде қарастырылады.
Ал Конституциялық Соттың тәуелсіз мемлекеттік орган ретінде бекітілуі — Конституцияның үстемдігін қамтамасыз етудің маңызды негіздерінің бірі.
Қарапайым тілмен айтқанда, мықты мемлекет дегеніміз — әр органның не үшін жауап беретіні анық, азаматтың құқығын қорғаудың тетіктері қалыптасқан және қабылданған шешім үшін жауапкершілік нақты болатын мемлекет.
Тұрақты институттар — тұрақты мемлекет негізі.

ИНАБАТ КИМБАЕВА
Арал аудандық мәдениет үйінің қызметкері