Жолдау-2026: логистика инфрақұрылымын дамытуға баса мән беру қажет
Фото: Н.НұржаубайПрезидент Қасым-Жомарт Тоқаев Қазақстан халқына Жолдауында көлік-логистика инфрақұрылымын дамытуға баса мән беру қажеттігін айтты, деп хабарлайды Zakon.kz.
Мемлекет басшысы логистиканы елдің өсіп-өркендеуіне ықпал ететін маңызды факторлардың бірі деп атады.
«Қазіргі таңда логистика мәселесімен барлық елдер айналысуда. Дамыған көлік логистикасы болмаса, тіпті, бүгінгі күшті ел ертең құрдымға кетеді», – деді Президент.
Қасым-Жомарт Тоқаев келесі жылы «Бақты – Аягөз» теміржол желісі іске қосылатынын мәлімдеді.
«Жаңа бағыттың арқасында Қытаймен арадағы жүк өткізу мүмкіндігі 20 миллион тоннаға артады», – деді Мемлекет басшысы.
Сондай-ақ президент тамыз айында құрылысы басталған «Арал – Каспий» күре жолының маңызына тоқталды.
«Бұл жоба Транскаспий дәлізінің қашықтығын шамамен 1 мың шақырымға қысқартып, жүк жеткізу мерзімін үш күнге дейін азайтады», – деді Қасым-Жомарт Тоқаев.
Мемлекет басшысы Үкімет осы салада қолға алынған барлық жобаның сапалы әрі уақтылы орындалуын қатаң бақылауға алатынын айтты.
