Музей – тәрбие өзегі
Жақында Арал қалалық тарихи музейінде жалпыреспубликалық «Музейлер шеруі» жобасы аясында Жастар ресурстық орталығы, Арал аудандық оқушылар үйі, жергілікті жыр-термешілердің қатысуымен қала тұрғындарына «Музей түні» мәдени шарасы ұйымдастырылды. Музей — адамзаттың рухани, материалдық құндылықтарының, ғылыми жетістіктерінің дамуы мен жай-күйін баяндайтын мәдениет ордасы ғана емес, ұрпақ жалғастығының негізгі алтын көпірінің бірі. Сондықтан да музейге бару, музейді тану, музейді бағалау мәдениетін қалыптастыру әрқайсымыздың өз қолымызда. «Музей түні» деген шараның мәніне келетін болсақ, бұл қонақтар мен қала тұрғындарына жақсы демалыс пен мерекелік көңіл-күй сыйлау үшін ұйымдастырылады. «Музей түні» тұңғыш рет 1997 жылдан бастап әлемнің көптеген елдерінде атап өтіле бастағанын айта кету керек.«Музей түні» жобасының негізгі мақсаты – тарихи-мәдени мұраларға арналған бірегей шаралар мен бағдарламаларды ұйымдастыра отырып, еліміздің негізгі мәдени-білімнің ошағы және белсенді әлеуметтік-мәдени мекемесі болып табылатын музей саласына жұртшылықтың назарын аударту.
Шара барысында қонақтарға тақырыптық экскурсиялар, халық жазушысы Ә.К.Нұрпейісовтің 95 жасқа толуына орай «Теңіздей тебіренген тұлға» атты фото, кітаптар көрмелері ұйымдастырылды. Оқушылар үйінің өнерпаздарының қатысуымен Ұлы ақын А.Құнанбаевтың 175 жылдығына орай «Абайды оқы – таңырқа!» тақырыбында өлеңдер оқылды.
Тағылымды кеште жандарына рухани демалыс сыйлаған қала тұрғындары бастамасы жақсы игі іс-шараға қолдау білдіріп, жастардың көптеп тартылуы, жастардың бір сәт болса да уақытын тиімді өткізіп, өз ұлттық құндылығын тануға мол септігін тигізер еді деген ниетін жеткізді.
Мадина Құрманқұлова,
музей қызметкері
