200 компания төрт күндік жұмыс аптасына көшті

Ұлыбританияда жаңа жұмыс кестесіне маркетинг, технология және қайырымдылық секторларындағы ұйымдар көшті, деп хабарлайды Egemen.kz The Guardian басылымына сілтеме жасап.

«4 Day Week Foundation» қорының директоры Джо Райлдың айтуынша, жаңа жұмыс кестесі компаниялар мен қызметкерлер үшін өте тиімді. Төрт күндік апта адамдарға «бақытты және қанағаттанарлық» өмір сүруге мүмкіндік береді.

Алайда, мұндай шешіммен штаб-пәтерлері АҚШ-та орналасқан компаниялар келіспеген. Мәселен, Amazon компаниясының қызметкерлері аптасына бес күн кеңсеге келуді талап еткен.

Spark Market Research Ұлыбританияда зерттеу жүргізіп, жас қызметкерлердің дәстүрлі жұмыс үлгілеріне қарсы тұруы ықтимал екенін анықтаған. Нәтижесінде 18-34 жас аралығындағы респонденттердің көпшілігі 2030 жылға қарай қысқартылған жұмыс аптасы барлығы үшін тиімді болады деп тұжырымдаған.

Айта кетейік, жаңа кестеге ауысқан қызметкерлердің жалақысы өзгермейді.

Сурет: Нұрболат Нұржаубай