Керіліп-созылмақшы болған бойжеткен ауыр дертке душар болды
Керіліп, басын шайқап, мойынын қытырлатып "үзбек" болған 23 жасар Лондон тұрғыны төсекке таңылды, деп жазды The Mirror. Натали Куницки төсегінде кино көріп жатқан. Бір уақытта ұйықтар алдында орнынан тұрып, аяқ-қолын созып, керіліп алмақшы болады. Мойнын қытырлатқанда қатты дыбыс та шығады. Бірақ қыз оған онша мән бермеген. Төсекке жатып, біраз уақыттан кейін қозғалайын десе сол аяғы жансызданып қалғанын байқайды. Қыз бірден жедел жәрдемге телефон соққан. Дәрігерлер оның арқадағы қан тамырына зақым келгенін анықтаған. Ал ол мидағы қанның ұюына әкеліп, инсульт тудырған. Хирургтар ота жасап, жарылған қан тамырды қалпына келтіруге тырысқан. Бірақ ұйыған тромбты жоя алмаған. Салдарынан қыздың сол жағы істемей қалды.
Оңалту ем-дом шараларын қабылдаған қыздың денсаулығы қазір бірте-бірте жақсарып келеді. Өздігінен киініп, 5 минуттай жүріп-тұра алатын халге жеткен.
"Мен темекі шекпеймін, арақ ішпеймін, отбасымда ешкім инсультпен ауырмаған. Сондықтан бұл мен үшін мүлде түсініксіз жайт. Жай ғана төсекте жатып, осылай болып қалам деп кім ойлаған", - дейді іштей күйінген Натали.
