Армениялық көліктерге салық екі рет салынбайды
Былтыр ақпанға дейін Армениядан көлік әкеліп, елімізде есепке қойған қазақстандықтар салалық заңға сәйкес, көлік салығын төлеуі тиіс.2006 жылғы Табыс пен мүлiкке салынатын салыққа қатысты қосарланған салық салуды болдырмау және салық салудан жалтаруға жол бермеу туралы конвенцияның ережелеріне сәйкес, Қазақстан мен Армения қаржы министрліктері қосарланған салық салудың алдын алу мақсатында көлік құралдарына салық салу бойынша өзара уағдаластыққа қол жеткізді.
«Еліміздің азаматтары Қазақстанның аумағына әкелген автокөліктер бүгінге дейін Арменияның уәкілетті органдарында тіркеу есебінен шығарылмаған соң, екі мемлекет те осындай көлік құралдарына салық салуға хақылы.
Тиісті келіссөздер нәтижесінде Армениядан 2020 жылдың 1 ақпанына дейін әкелініп, меншік құқығы бойынша Қазақстанның резиденттеріне тиесілі автокөліктерге конвенцияның 21-бабы 4-тармағына сәйкес, еліміздің Ішкі істер министрлігінде тіркеу есебіне қойылған сәттен бастап, ұлттық заңнама бойынша Қазақстанда ғана салық салынады. Бұл мақсатта екі мемлекеттің салық органдары елімізде тіркелген күнін көрсете отырып, осы көлік құралдары бойынша мәліметтер алмасатын болады. Мұндай көлік құралдарына қосарланған салық салу мәселесі туындамайды», деді Қаржы министрлігінің өкілдері.
Салық кодексінің нормаларына сәйкес, көлік салығын төлеу міндеті жылжымалы мүлікті Қазақстанның мемлекеттік органдарында есепке қойған күннен бастап жүктеледі. Атап айтқанда, егер де көлік құралы былтыр қарашада тіркелсе, биылғы сәуірден кешіктірмей 2020 жылдың қараша-желтоқсан аралығына байланысты бюджетке көлік салығын төлеу қажет. Бұл міндет орындалмаған жағдайда әр өткізілген күн үшін өсімпұл есептеледі.
egemen.kz
