Кездесу көптің көңілінен шықты

«Жақсының жақсылығын айт, нұры тасысын» дейді халқымыз. Елдегі үлгі аларлық жақсы істерді айту үлкендік парыз деп білемін. «Халқың қаласа, хан боларсың» деген. Ел болған соң, көпшілік мәселесін жеткізеді, тілегін айтады. Сонымен бірге көз көрген қуанышты жеткізіп отыру – міндетіміз.Облыс басшысы Қуанышбек Ысқақов солтүстік аудандардың елді мекендерін аралайды деген хабар естігеннен кейін, ауыл тұрғындары әкім тікұшақпен келіп кете ме, әлде көлікпен жер-жерді аралай ма деген ойда болды. Аймақ басшысы шалғайдағы елді мекендердің тыныс-тіршілігімен ат үсті таныспай, көзбен көріп, халықпен тілдессе деген көпшіліктің тілегі болғанын жасыра алмаймыз. Бұған дейін Қырымбек Елеуұлының алыстағы ағайынға арнайы ат басын бұратын игі дәстүрін бүгінгі облыс әкімі Қуанышбек Досмайылұлы да жалғады. Аймақ басшысы сонау облыс орталығынан 600 шақырым шалғайда орналасқан Арал ауданының түтіні түзу, бірлігі мен тірлігі жарасқан Жаңақұрылыс елді мекенінің тұрғындарымен алғашқы кездесуін бастады. Әрине бұған ауыл тұрғындары үлкен қуанышта болды. Халықтың жайымен етене таныс болу үшін жол қиындығын елемей келіп, жиналған халықты жаңа жылмен құттықтап, береке-бірлік тіледі. Сосын облыс көлемінде жүргізілген жұмыстар мен алдағы уақытта атқарылатын жұмыстарды айтып, ұсыныспікірлерімізді тыңдады.
Тұрғындар тарапынан бүгінгі таңда жол мен байланыс өзекті мәселе екендігі айтылды. Бұған аймақ басшысы көтерген мәселерің орынды екенін, жауапты мекемелердің басшыларымен жан-жақты қарап, оң нәтиже шығаратынын айтты. Арал ауданынан шалғай орналасқан қаншама ауылды аралап, тыныс-тіршілігін көзбен көріп, өтініш-тілектерін естіп, аманат арқалау – үлкен жұмыс.
Облыс басшысының елге жасаған сапарына ауыл тұрғындары ризашылығын білдіріп, ауыл ақсақалдары батасын берді.
Сердалы Шалбаев,
Жаңақұрылыс ауылдық ардагерлер кеңесінің төрағасы.