Президент қымбат көліктер сатып алуға және түрлі форумдар өткізуге ұзақ мерзімді мораторий жариялауды ұсынған болатынҚазақстан Дүниежүзілік сауда ұйымының министрлік конференциясы мен Астана экономикалық форумын бірге өткізуді жоспарлап отыр. Осылайша ел билігі форумға бөлінетін ақшаны үнемдеп қалмақ. Бұл туралы бүгін бірінші вице-премьер, қаржы министрі Әлихан Смайылов мәлімдеді, деп хабарлайды sputniknews.kz тілшісі.

"Біз биыл ДСҰ министрлік форумын өткіземіз. Бұл халықаралық форум, оған министрлер деңгейінде 200-ге тарта ел қатысады. Біз осы шара аясында Астана экономикалық форумын да өткізуге бел байладық. Осылайша, қаражатты үнемдейміз", - деді Смайылов мәжіліс кулуарында.

Астана экономикалық форумы - жаһандық мәселелерді талқылауға және шешуге арналған жыл сайынғы сұхбат алаңы. Форум әлемдік көшбасшылардың, халықаралық сарапшылардың, ғалымдардың, саяси және қоғам қайраткерлерінің, түрлі қаржы институттары мен бизнес-қоғамдастықтар өкілдерінің басын қосады.