Балықшылар назарына!
Қазіргі таңда балық аулау кезінде Қазақстан Республикасының Ішкі істер министрлігінің 2015 жылғы 19 қаңтардағы №34 бұйрығымен бекітілген «Су айдындарындағы қауіпсіздік қағидаларының» талаптары сақталмай, қайғылы жағдайлардың орын алуы толастамай отыр. Жыл сайын теңізден түрлі себептермен балықшылардың суға кетіп, қайтыс болу факторлары тіркеліп отыр. Әрине, балық аулауды кәсіп қылып, жанұясын асырап отырған азаматтар екендігі бәрімізе мәлім. Дегенмен де, өз өмірін тәуекелге тігіп, сақтық шараларын ұмытуға болмайтындығын әрқашан естен шығармаған абзал.«Су айдындарындағы қауіпсіздік қағидаларының» талаптарына сәйкес, жүзу құралдары-ақаусыз болуы, құтқару шеңберлерімен, құтқару жилеттерімен және «Александров жібімен» міндетті түрде қамтамасыз етілуі тиіс және оны белгіленген нормадан артық жүктеуге болмайды. Негізінен ауданымызда балықшылардың кеңінен қолданылатын жүзу құралы «Прогресс» маркалы қайықтар екендігі белгілі. Аталған қайықты дайындаушы завод оның алдыңғы, артқы және қапталынан арнайы су кірмейтін бөліктермен жабдықтап, яғни, 475-500 кг салмаққа дейін көтеріп, су бетінде батпай еркін тұруын қамтамасыз етеді. Дегенмен, көптеген балқшылар жоғарыда аталған бөліктерін (қайықтың ішін кеңейту мақсатында) алып тастайды немесе қайықтың пайдалану мерзімі ескіріп, коррозияға ұшырап, ақаулы күйде болады. Сонымен қатар, аталған қайықтың техникалық көрсеткіштері тек қана толқынның биіктігі 0,75 метрден аспайтын өзен,көлдерде және жағалаудан 3 шақырым арақашықта ғана жүзуге мүмкіндік береді. Сол себепті, Кіші Арал теңізінде балық аулағанда аталған қайық адам қауіпсіздігін толық қамтамасыз етпейтіндігі түсінікті.Сонымен қатар, күннің салқын мезгілінде құтқару құралдарының өзі адам өмірін сақтап қала алмайтындығын ұмытпаған абзал. Себебі салқын суда адам ағзасының температурасы санаулы минуттарда шамадан тыс төмендеуінен, қайғылы жағдайға алып келуі әбден мүмкін. Кіші Арал теңізін пайдаланушы серіктестіктер мен кәсіпкерлік ұйымдар жоғарыда аталған су айдындарындағы қауіпсіздік қағидаларының сақталуына өз тарапынан бақылауды күшейту керектігін білдіреміз.
А. Сыдықов,
Арал ауданының төтенше жағдайлар бөлімінің
бас маманы азаматтық қорғау капитаны.
