Толқын Tolqyn.kz ақпараттық агенттігі
» » Қызылорда облысындағы су айдындарында 29 адам қаза болды

Қызылорда облысындағы су айдындарында 29 адам қаза болды

Суға түсу маусымы басталғаннан бері сақтық шараларын сақтамай, қайғылы жағдайға ұшырап жатқандар аз емес. Облыстағы су айдындарында, әсіресе Сырдария өзенінде азаматтардың әртүрлі себептермен қайғылы жағдайға ұшырауы, оның ішінде суға шомылу маусымында судағы адам қазасы өзекті мәселеге айналды. Бұл туралы kyzylorda-news.kz сайтында хабарланды.

Өткен жылы облыс бойынша суда 22 адам қаза тапқан. Оның 8-і балалар. Бұл туралы Қызылорда облысының Төтенше жағдайлар департаменті бастығының орынбасары, полковник Саид Молдақараев және Төтенше жағдайлар департаменті «Өрт сөндіру және авариялық-құтқару жұмыстары қызметі» мемлекеттік мекеме бастығы, азаматтық қорғау подполковнигі Нұрсұлтан Ибрагимовтің қатысуымен өткен баспасөз мәслихатында белгілі болды.
«Биылғы 2019 жылдың басынан 5 тамызға дейін облыс аумағындағы су айдындарында 29 адам қаза болған. Оның 12-і бала. Қызылорда облысының аумағындағы су айдындарында қауіпті учаскелердің саны 64, сол жерлерде 163 ескерту тақтайшалары орнатылған және судағы қауіпсіздік бойынша 60 билборд орнатылды», - дейді Саид Молдақараев.
Аталған деректерде анықталғандай, 12 адам балық аулау кезінде, 20 адам суға түсуге арналмаған жерде батып, 4 адам абайсыз жағдайда, 2 адам белгісіз жағдайда суда қалқып кеткен.
Айта кету керек, белгіленбеген жерде суға түскен азаматтар «Әкімшілік құқық бұзушылық туралы» Қазақстан Республикасының 2014 жылғы 5 шілдедегі №235 кодексінің 364-бабына сәйкес бірнеше айлық есептік көрсеткіш мөлшерінде айыппұл төлейді.
https://baq.kz/news/othernews/biyl-yzylorda-oblysynda-su-aydyndarynda-29-adam-aza-bol-an/
07 тамыз 2019 ж. 1 053 0