Су тасқыны кезінде инфекциялық аурулардың алдын алу шаралары

Қыс мезгілінде жиналған  қоқыспен бірге жұқпалы аурулардың  қоздырғыштары көктемде еріген қар мен мұзбен бірге өзендер, құдықтағы суларға түсіп, суды ластайтыны белгілі. Осыған байланысты су жолымен қандай жұқпалы және жұқпалы емес аурулар беріледі деген  сұрақ көпшілікті мазалайтыны рас.  Су тасқыны кезінде жұқпалы ауруларды тудыратын қолайсыз эпидемиологиялық жағдайлар дамуы мүмкін.  Су жолымен  гепатиттер, тырысқақ, іш сүзегі, паратифтер, дизентерия, лептоспироз, туляремия (ауыз судың кеміргіштердің бөлінділерімен ластануы), құрттар, бруцеллез, сальмонеллез беріледі. Арал ауданының санитариялық-эпидемиологиялық бақылау басқармасы су тасқыны кезінде түрлі аурулардың алдын-алу үшін тұрғындардың келесі қарапайым және тиімді ережелерді сақтауы қажеттігін ескертеді:

-ішуге және тамақ дайындауға тек шөлмектегі немесе қайнатылған суды пайдалану;

-су басқан жерлерде бұлақтардан, құдықтардан және ұңғымалардан су ішпеу;

-шөлмектегі  ауыз су қорын қамтамасыз ету және кеміргіштер  қолы жетпейтін жерлерде жабық ыдыстарда сақтау;

-тасқын сулармен  ылғалданған  тамақ өнімдерін пайдаланбау;

-ауланы қоқыстан тазарту;

-су тасқынынан кейін барлық  үй-жайларды дезинфекциялық ерітінділермен өңдеу;

-толтырылуына қарай қазылған  шұңқырларды уақытылы сорғызу;

-ауыз су мақсатында пайдаланылатын ұңғымаларды тазарту, дезинфекциялау;

-су тасқынының  тағы бір проблемасы–кеміргіштер, көптеген аурулардың қоздырғыштары.

Олар тұрғын үйлер ғимараттарына еніп, адамның жұқпалы және паразиттік аурулармен ауыру қаупіне ықпал етуі мүмкін.

Гигиеналық  ережелерді сақтау Сізді көптеген аурулардан қорғайды!

О. МОШАНОВ,

Арал аудандық санитариялық-эпидемиологиялық бақылау
басқармасының басшысының міндетін атқарушы.