Кітапханашыларға құрмет көрсетілді

Биыл Мемлекет басшысы Қасым-Жомарт Тоқаев 25 қазан – Республика күнін маңызды мерекелер санатына қосып, оны биылдан бастап қайта тойлауды ұсынған болатын. Бұл барша қазақ жұрты үшін үлкен қуанышты мерекелердің бірі болды. Сәйкесінше Ұлттық мерекеміз еліміздің әр аумағында кең көлемде аталып өтуде. Ал төл мерекемізбен тұспа-тұс келген 24 қазан – кітапханашылар күні де бұл сала өкілдерінің мерейін асырып, кітап сүйер қауымның қуанышын еселеді. Иә, кітап – өз маңызын жоймайтын біздің құнды дүниеміз. Осы орайда Арал аудандық Абай кітапханасында «Егемендігін жыр еткен, келбетін арай күн еткен» атты мерекелік кеш өтті.

Салтанатты шара барысында аудандық мәдениет және тілдерді дамыту бөлімінің басшысы Б.Махатов:

– 3 қазаннан бастау алған Арал қаласының 95 жылдығы мен 25 қазан – Республика күні де үлкен дәрежеде аталып өтілді.Сонымен бірге осы мерекелермен тұспа-тұс келген айрықша маңызға ие кітапханашылар мерекесімен барша кітапханашылар қауымын құттықтаймын.Жастар мен кітапты байланыстыратын алтын көпір кітапхана десек, мұндай іргелі қара шаңырақтың мәртебесі биік болып қала бермек, – деді.

Кеш барысында аудандық мәдениет үйінің әншісі С.Дінжанова «Сыр сұлуы» атты әнің орындап, кітапхана оқырманы Рыскүл Әбенқызы Республика күніне арнап жазылған жыр шумағын қалың көпшілікке оқып, жиналған қауымның ризашылығына бөленді. Мерекелік кешті қорытындылау барысында аудандық мәдениет және тілдерді дамыту бөлімінің басшысы Б.Махатов еңбегі елеулі кітапханашыларды марапаттады.