Елордадағы көшелердің біріне өрт сөндіруші Асқар Забикулиннің есімі берілді

Елордада өрт сөндіруші Асқар Забикулин өрт шығып жатқан тұрғын үйлерден тұрғындарды құтқарып қалған болатын. Мемлекет басшысы жуырда өрт сөндірушілерді марапаттау туралы Жарлыққа қол қойған еді. Қызметтік борышын атқару кезінде көрсеткен батырлығы мен ерлігі үшін Төтенше жағдайлар министрлігі Астана қаласы Төтенше жағдайлар департаменті өрт сөндіру және авариялық-құтқару жұмыстары қызметі жедел кезекшісінің көмекшісі Асқар Забикулин І дәрежелі "Айбын" орденімен, Төтенше жағдайлар министрлігі Астана қаласы Төтенше жағдайлар департаменті өрт сөндіру және авариялық-құтқару жұмыстары қызметі №10 өрт сөндіру бөлімінің командирі Аян Кемпіров ІІІ дәрежелі "Айбын" орденімен марапатталған болатын.
Мемлекет басшысы Қасым-Жомарт Тоқаев өрт болған үйдетұрғындарды құтқару уақытында жарақаттанып, ауруханада көз жұмған Асқар Забикулиннің отбасы мен жақын туыстарына көңіл айту жеделхатын жолдады. 
“Асқар  Серікұлы төтенше жағдайлар саласында еңбек етіп, елімізге адал қызмет етудің үлгісін көрсете білген азамат еді. Астанадағы көпқабатты үйде болған өрт кезінде оқиға орнына шұғыл жетіп, бірнеше адамның өмірін сақтап қалды. Осы бір әрекеті арқылы ол Отан алдындағы азаматтық антына берік екенін және жанқиярлық ерлігін көрсетті. Оның есімі мен жарқын бейнесі халқымыздың жүрегінде сақталады. Марқұмның жаны жәннатта, иманы саламат болсын”, – деп жазылған жеделхатта.
Сонымен бірге мемлекет басшысының тапсырмасына сәйкес батыр өрт сөндірушінің есімі ел есінде мәңгі сақталу мақсатында, Елордадағы көшелердің біріне Асқар Забикулиннің есімі беріліп, бюсті орнатылды.

"Толқын" ақпарат