Жеңілдетілген несие – жастарға

Кәсіпкерлікті дамыту еліміз үшін ең маңызды міндеттердің бірі саналады. Ел Президентінің 2021-2025 жылдарға арналған кәсіпкерлікті дамыту жөніндегі тапсырмасына сәйкес бірнеше жоба іске асуда. Сонымен кәсіпкерлік дамыту мақсатында жеңілдетілген несие берудің жаңа бір нұсқасы дайындалды.Биылдан бастап Ұлттық жоба аясында жеңілдікпен микрокредит беру қағидасы бекітілді. Бұл несиеге 21 жастан 35 жасқа дейінгі жастар ғана ие бола алады. Жастар бұл несие арқылы жаңадан іс бастай алады әрі бастаған кәсібін кеңейтуге мүмкіндігі болады. Үміткерлер тауарларды өндіру, жұмыстарды орындау және қызмет көрсету, сату не айырбастау үшін жеке қосалқы шаруашылықта өнім өндіру жөніндегі қызметті іске асыру керек. Сонда ғана конкурстық негізде беретін микрокредитке қол жеткізе алады.
Микрокредитке «Аграрлық несие корпорациясы» АҚ арқылы қол жеткізе алады және номиналды сыйақы мөлшерлемесі жылдық 2,5 пайыздан аспайды. Сонымен бірге қарыздың ең жоғарғы сомасы 5 млн теңгеге дейін әрі кепіл міндетті түрде болуы қажет. Бұл несие жастарға кез келген мақсат үшін 5 жылға дейін, ал мал шаруашылығына 7 жылға дейінгі уақытқа беріледі. Мемлекеттен жастарды қолдау мақсатында республикалық бюджеттен 28 млрд теңгеден астам қаржы бөлінбек. Осы мүмкіндік жастар толық пайдаланса, 5,7 мың жас жеңілдетілген несиемен қамтамасыз етілмек.
Қазіргі таңда Еңбек және халықты әлеуметтік қорғау министрлігі жергілікті атқарушы органдармен кредиттік шарт жасасу, «Аграрлық кредиттік корпорация» АҚ-мен жергілікті атқарушы органдардың тапсырма шартын әзірлеу, бизнес-жобаларды қарау бойынша өңірлік комиссиялар құру бойынша жұмыстарын жүргізуде. Содан кейін несие алуға өтінім қабылдау уақыты белгілі болады.

«Толқын» ақпарат