Әлеуметтің әлеуетін көтеруге негізделген қадам
Күздің алғашқы айында күллі қазақстандықтарға Мемлекет басшысы Қасым-Жомарт Кемелұлы Тоқаев өзінің кезекті Жолдауын жариялады. Осынау «Әділетті Қазақстанның экономикалық бағдары» атты стратегиялық құжатта қазақ халқының ертеңін еңселі етуге бағытталған негізгі міндеттер сөз болды. Президент болашаққа бағдар болатын өз Жолдауында әлеуметтің әлеуетін көтеруге ерекше басымдық беріп, жас санаға сапалы білім берген мұғалімдер мен дәрігерлер қауымының жалақысын арттыруға қарышты қадамдар жасалғанын, зейнетақы жинағының бір бөлігін пайдалануға мүмкіндік берілгенін, сонымен бірге «Жайлы мектеп» жобасы аясында 400-ге жуық мектеп салынатынын атап, қазіргі таңда ауылдық жерлерде 300-ден астам денсаулық сақтау нысаны бой көтеріп жатқанын ортаға салды.Сондай-ақ Жолдауда Президент пәрменімен келер жылы қолданысқа енетін «Ұлттық қор – балаларға» жобасы қолға алынып, нәтижесінде 2024 жылдан бастап балалар есепшотына қаражаттар түсе бастайтынын баяндады. Бұл дегеніміз, келешек иелеріне деген үлкен көмек еді. Бұдан басқа да маңызды салаларға қатысты міндеттемелерді айтқан Мемлекет басшысы ауыл шаруашылық, кәсіпкерлік салаларын дамытуға жасалып жатқан баянды бастамалар мен толымды тірліктер төңірегінде ой қозғап, игерілмей жатқан немесе заңсыз берілген 8 млн. гектар жер мемлекет меншігіне қайтарылғанын тілге тиек етті.
Жалпы, Жолдаудағы әрбір сөзі көңілге қонымды. Әлемдік саяси аренада өзіндік орны бар Мемлекет басшысы Қасым-Жомарт Тоқаевтың ұтырлы ұстанымы, байыпты байламы әрдайым Қазақстан мемлекетінің өркендеуіне негізделетініне тағы бір мәрте көз жеткіздік. «Әділетті Қазақстанның экономикалық бағдары» атты бүгінгі сиясы кеппеген Жолдау барша аудан жұртының көңілінен шығатыны анық.
Абай ЕЛЕШОВ,
«Толқын» газетінің бас редакторы,
«Amanat» партиясының мүшесі
Фото: egemen.kz
