Банк карталарын бақылау күшейеді

Елімізде банк карталарын рәсімдеу ережелері күшейеді. Қаржы нарығын реттеу және дамыту агенттігі (ҚНРДА) қаржы пирамидалары мен заңсыз ақша айналымына қарсы жаңа шектеулер енгізбек. Енді картаны онлайн ашу қиындайды, ал күмәнді транзакциялар мұқият бақыланады.

Қандай өзгерістер бар? Тізіп шы­ғайық. Біріншіден, банк карталары енді тек өз нөміріңізге тіркеледі. Яғни банк­тер барлық шот пен карталарды тек азаматтың өз атына рәсімделген отан­дық телефон нөміріне байлайды. Бұл қар­жылық операцияларды бақылауды кү­шейтіп, бөтен адамдардың біреудің атынан карта рәсімдеуіне тосқауыл қояды.

Екіншіден, 18-21 жас аралығындағы жастар онлайн карта ала алмайды, қайта шығаруға да өтініш бере алмайды. Бұл жас ерек­шелігіне байланыс­ты қауіптерді азайтып, қар­жылық алаяқтықтың алдын алу үшін жасалған. Енді жас азаматтар банк картасын рәсімдеу үшін банк бөлімшесіне өздері барып, жеке басын растауға тиіс.

Үшіншіден, шетелдік­терге банк картасын алу қиындайды. Елі­мізде жүрген шетелдік аза­маттар енді банк картасын алу үшін өздерінің елде заңды түрде жүргенін дә­лел­деуі керек. Бұған қоса, жаңа карта ашылғаннан кейін­гі алғашқы 3 ай ішінде барлық қаржылық операция мұқият бақыланады. Егер жасалған аударымдар күдікті болып, клиенттің көрсеткен мақсатына сәйкес келмесе, қосымша тексеру жүргізіледі.

Төртіншіден, ҚНРДА алаяқтық схемаларды болдырмау мақсатында «бір адам – бір карта» қағидасын енгізуді жоспарлап отыр. Яғни әр азамат тек бір төлем картасын ғана пайдалана алады. Дегенмен бұл шектеу арнайы әлеуметтік төлемдер үшін ашылған карталарға, балалар карталарына және несие карталарына қолданылмайды.

Бесіншіден, онлайн несие рәсімдеу қиындайды. Бірінші рет несие алғысы келетіндер енді онлайн өтінім бере алмайды. Олар міндетті түрде қаржы ұйы­мының кеңсесіне барып, жеке басын растауы керек. Бұл қадам несие тари­хы жоқ азаматтардың ойланбай несие алуын шектеуге әрі олардың төлем қабі­леттілігін мұқият тексеруге бағытталған.

Қаржы саласындағы сарапшылар бұл өзгерістер қаржылық тәртіпті нығай­тып, заңсыз қаражат айналы­мына тосқауыл қояды деп есептейді. Алаяқтардың жал­ған шоттар ашып, басқа адамдардың атынан карта рәсімдеуін болдырмайды деген үміт бар.

Ақпарат көзі: egemen.kz
Фото: Нұрболат Нұржаубай