23 мамыр – оқушылар үшін соңғы сабақ күні

Оқу-ағарту министрінің бұйрығына сәйкес мектептерде оқу мерзімі дәстүрлі түрде 34 аптаға созылады, оқу 25 мамырда аяқталады, деп хабарлайды BAQ.KZ тілшісі.

   Орта білім беру ұйымдарында сабақ аптасының бес күндік екенін ескере отырып, 1-10 сынып оқушылары үшін соңғы сабақ күнін 23 мамырда “Білімім — Отаныма” тақырыбында бірыңғай сынып сағаты форматында өткізу туралы ұсыным берілді. 11-сынып түлектері үшін салтанатты шара мектеп әкімшілігінің шешімімен 23-ші немесе 24-ші мамырда мектеп қабырғасында өткізіледі, - деді Орта білім беру комитетінің төрағасы Қаныбек Жұмашев ОКҚ алаңында.

Ол салтанатты іс-шараны өткізу форматын, қатысушылар құрамын білім беру ұйымдары анықтайтынын айтты.

Сонымен қатар оқу-ағарту министрлігінің бұйрығына сәйкес 9 және 11 сынып оқушылары үшін қорытынды мемлекеттік емтихандардың мерзімдері айқындалды.

    9-сынып оқушылары үшін қорытынды мемлекеттік емтихандар 2025 жылғы 29 мамыр мен 10 маусым аралығында өтеді деп жоспарланды. Ал 11-сынып түлектері 30 мамыр мен 16 маусым аралығында мемлекеттік бітіру емтихандарын тапсырады, - деді Жұмашев.

Мектеп бітіру аттестаттарын түлектерге тапсыру салтанатын 18-20 маусым аралығында өткізу жоспарланып отыр.