Медицина қызметкерлеріне МӘМС жүйесіндегі өзгерістер таныстырылды

Өңірдегі медициналық ұйымдарда Әлеуметтік медициналық сақтандыру қорының Қызылорда облысы бойынша филиалының өкілдерімен кездесулер өтуде. Сарапшылар «Міндетті әлеуметтік медициналық сақтандыру туралы» Заңға енгізілген өзгерістерді, жаңа шарттар бойынша Қормен өзара іс-қимыл тәртібін түсіндіріп, МӘМС жүйесіндегі өзекті мәселелерді талқылады.

Басты мақсат – халықты МӘМС жүйесімен кеңінен қамту және медициналық көмектің қолжетімділігін арттыру.

Қор филиалы директорының орынбасары Жұпар Алхожаеваның айтуынша, 2026 жылдан бастап енгізілетін бірқатар өзгерістер ауруларды ерте кезеңде анықтауға мүмкіндік береді:

•8 әлеуметтік мәні бар ауру бойынша диагностикалық тексерулер;

•Амбулаториялық диализ;

•Жоғарғы асқорыту жолдарының, қалқанша безі, жүрек-қан тамырлары және генетикалық аурулар сияқты 12 түрлі созылмалы ауру бойынша амбулаториялық және стационарлық қызметтер;

•Онкологиялық скринингтер - МӘМС жүйесінде сақтандырылған мәртебесіне қарамастан барлық азаматтар үшін тегін.

Сондай-ақ, кездесу барысында медициналық этика, беделді басқару, пациенттермен кері байланыс және тұрғындарды кеңінен ақпараттандыру мәселелеріне де ерекше назар аударылды.