Жасанды интеллект – ұстаздың жаңа цифрлық серіктесі
Бүгінде білім беру саласы цифрлық технологиялардың қарқынды дамуына байланысты жаңа мүмкіндіктерге ие болуда. Әсіресе жасанды интеллект құралдарын тиімді пайдалану мұғалімнің күнделікті жұмысын жеңілдетіп қана қоймай, шығармашылық ізденісіне тың серпін беріп отыр. Осы бағытта №14 мектеп-лицейінде педагогтердің цифрлық мүмкіндіктерін кеңейтуге арналған «Педагогтерге арналған Vibecoding: тәжірибелік интерактивті құралдар жасау шеберханасы» атты практикалық интенсив ұйымдастырылды.Кездесу Kyzylorda Hub өңірлік IT хабымен бірлесіп өткізілді. Шараның негізгі мақсаты – педагогтерге жасанды интеллект мүмкіндіктерін білім беру үдерісінде тиімді қолданудың жолдарын көрсету, сондай-ақ мұғалімдердің өз идеяларын заманауи цифрлық өнімге айналдыруына қажетті практикалық дағдыларды қалыптастыру.
Google Meet платформасында өткен интенсивті Kyzylorda Hub директоры Жанарыс Түбекбаев жүргізді. Шара барысында педагогтерге OpenAI Codex мүмкіндіктері таныстырылып, жасанды интеллектпен жұмыс істеудің тиімді тәсілдері тәжірибе жүзінде көрсетілді.
Интенсив барысында мұғалімдер жасанды интеллект көмегімен сайт әзірлеу, цифрлық кітап жасау, күнделікті кәсіби міндеттерді орындауға арналған жеке цифрлық көмекші қалыптастыру және белгілі бір идеяны қысқа уақыт ішінде нақты цифрлық өнімге айналдыру жолдарын меңгерді.
Практикалық тапсырмалар педагогтерге жасанды интеллектінің мүмкіндігін жан-жақты түсінуге мүмкіндік берді. Қатысушылар оның тек ақпарат іздейтін немесе мәтін құрастыратын құрал емес, мұғалімнің шығармашылық идеясын жүзеге асыруға көмектесетін заманауи цифрлық серіктес екенін тәжірибе арқылы байқады.
Мұндай оқыту шаралары педагогтердің цифрлық сауаттылығын арттырып қана қоймай, оқу үдерісін жаңа мазмұнмен толықтыруға жол ашады. Заманауи цифрлық құралдарды сабақ барысында орынды пайдалану оқушылардың қызығушылығын арттырып, оқу материалын ұсынудың жаңа тәсілдерін қалыптастыруға мүмкіндік береді. Сонымен қатар мұғалімнің уақытын үнемдеп, күнделікті қайталанатын жұмыстарды оңтайландыруға ықпал етеді.
Бүгінгі ұстаз үшін технологияны меңгеру – заман талабына сай болудың ғана емес, білім сапасын арттырудың да маңызды тетігі. Өз идеясын цифрлық құрал арқылы жүзеге асыра алатын педагог оқушыға да жаңа мүмкіндіктердің есігін ашады.
Білім беру кеңістігі жаңарған сайын мұғалімнің кәсіби ізденісі де жаңа сипатқа ие болуда. Ал цифрлық технологияны сауатты меңгерген ұстаз – өзгерісті сырттай бақылаушы емес, білім саласындағы жаңашылдықты қалыптастыратын тұлға.
Осындай мазмұнды практикалық кездесулердің көбеюі педагогтердің жаңа технологияларды игеруіне, кәсіби әлеуетін арттыруына және білім беру үдерісін заманауи талаптарға сай жетілдіруіне берік негіз болмақ.
Шыңғыс НҰРБАЙ
