Элизабет Тұрсынбаева әлемдегі ең үздік 15 мәнерлеп сырғанаушының қатарына кірді

Халықаралық конькишілер одағы мәнерлеп сырғанаушылардың жаңартылған рейтингін жариялады, деп хабарлайды Baq.kz ақпарат агенттігі Sports.kz сайтына сілтеме жасап.
Жаңа рейтингте әйелдер арасында бірінші орынды канадалық Кэйтлин Осмонд алды. Сондай-ақ, үздік 5 спортшының қатарында 3 ресейлік: Евгения Медведева, Мария Сотскова, Алина Загитова бар. Үздік бестікті жапониялық Сатоко Мияхара қорытындылап тұр.
Ал қазақстандық мәнерлеп сырғанаушы Элизабет Тұрсынбаева жаңа рейтингте 14-орынға тұрақтады. Сонымен қатар үш отандасымыз мәнерлеп сырғанаушылардың әлемдік рейтингіне кірді: Айза Мамбекова – 95-орын, Жансая Адыханова – 196-орын, Алана Тоқтарова – 261-орын.
Ерлер арасында бірінші және екінші орында жапониялық Юдзуру Ханю Сома Уноға бұйырды. Ал үздік бестіктің қатарына америкалық Нэтан Чен, ресейлік Михаил Коляда және испаниялық Хавьер Фернандес кірді.
Сондай-ақ жаңартылған тізімде қазақстандық спортшы Денис Тен 31-орынға тұрақтады. Ал Абзал Рақымғалиев 92-орыннан көрінсе, Артур Панихин 199-орынға жайғасты.
Айта кетейік, жақында Италияның Милан қаласында мәнерлеп сырғанаудан өткен әлем чемпионатында Элизабет Тұрсынбаева екі бағдарламаның қорытындысы бойынша 186.85 балл жинап, жалпы әлем біріншілігінде 11-орынға ие болған.
Ал Оңтүстік Кореяның Пхенчханында өткен қысқы Олимпиада ойындарында қазақстандық спортшы 12-орын алды.