Педагог мәртебесі: мұғалімдерге қосымша ақы қалай төленеді?

Білім және ғылым министрлігі «Педагог туралы» заңның аясында қосымша ақылардың қалай төленетінін түсіндірді деп хабарлайды syr-media.kz.
Вице-министр Бибігүл Асылованың айтуынша, қазіргі кезде мұғалімдердің арасында магистр дәрежесі бар мамандар аз. Олардың жалпы саны – 7,5 мың адам, яғни барлық педагогтың 3,5 проценті ғана. Ал әлемдік көрсеткіш 40-50 процентті құрайды. Осыған байланысты магистр атағы үшін 10 АЕК (26 510 теңге – Sputnik Қазақстан) көлемінде қосымша ақы қарастырылған.
«Сосын мектепке алғаш рет келген жас мұғалімге бір жылға тәлімгер бекітіледі. Ол педагогтың кәсіби дайындығы жоғары болуы шарт. Оған тәлімгерлік жасағаны үшін бір базалық қызметтік еңбекақының көлемінде қосыша ақы төленеді. Оның көлемі 17 697 теңгені құрайды», - деді Асылова.
Бұдан бөлек, сынып жетекшілігі мен дәптер тексергені үшін қосымша ақылардың көлемі екі есеге артып отыр.
«Бұған дейін сынып жетекшілігі үшін кем дегенде 4 424 теңге, әрі кетсе 5 309 теңге болған. Енді осы ақша екі есеге көбейеді. Сол сияқты дәптер тексергені үшін 3 533-4 424 теңге төленетін. Ол да екі есеге өседі», - деп атап көрсетті вице-министр.
Сондай-ақ, педагогикалық шеберлік үшін барлық мұғалімге 30-50 проценттік қосымша ақылар төленеді. Ол үшін ұлттық біліктілік тестін тапсырып, кәсіби дәрежені дәлелдеу керек. Ал мектеп директорлары мен олардың орынбасарлары өз жалақысын 30-100 процентке дейін өсіре алады.
«Жергілікті атқарушы органдар қосымша қолдау шараларын жасап, 300 айлық есептік көрсеткіштен (795 300 теңге) кем түспейтін сыйақы бере алады», - дейді Асылова.
Еске сала кетейік, осы уақытқа дейін мұғалімдердің енді шипажайда тегін емделетінін хабарлаған едік.