«БАҚЫТТЫ ОТБАСЫ» БАҒДАРЛАМАСЫ АЯСЫНДА КӨПБАЛАЛЫ ОТБАСЫ БАСПАНАЛЫ БОЛДЫ

Елімізде жүзеге асырылып жатқан «Бақытты отбасы» бағдарламасы аясында көптеген отбасы тұрғын үйге қол жеткізуде. Бұл бағдарламаға «Тұрғын үй құрылыс жинақ банкінде» салымы бар көп балалы отбасылар, кәмелеттік жасқа толмаған балалары бар толық емес отбасылар және мүмкіндігі шектеулі балалары бар отбасылар қатыса алады.

Кеше аудан әкімінің орынбасары Ж. Жұбанов және «Тұрғын үй құрылыс жинақ банкінің» Арал аудандық филиалының өкілі Ү. Қуатбаева аталған бағдарлама бойынша баспанаға қол жеткізген отбасында болды. Көпбалалы отбасының қуаныштарына ортақтасып, жаңа қоныс жайлы, балалардың шат күлкісіне толы болсын деген лебіздерін жеткізді.
Көпбалалы ана Биболатова Гүлнар «Тұрғын үй құрылыс жинақ банкіне» алдын ала салым жинау арқылы 2 пайыздық жеңілдетілген несиемен жаңа тұрғын үйдің құжаттарын рәсімдеді.
Атап өтейік, бұған дейін «Бақытты отбасы» бағдарламасы аясында аудандағы 5 отбасы баспаналы болды.
Аудан әкімдігінің баспасөз қызметі.