Толқын Арал аудандық қоғамдық-саяси газет
» » «АЛТЫН ДОМБЫРА» ИЕГЕРІ АРАЛДЫҚТАРМЕН КЕЗДЕСТІ

«АЛТЫН ДОМБЫРА» ИЕГЕРІ АРАЛДЫҚТАРМЕН КЕЗДЕСТІ

tolqyn.kz Тәуелсіздік мерекесі қарсаңында қасиетті Сыр топырағында өсіп-өнген, айтыс өнерінің ақтаңгері, дарабоз ақын Мұхтар Ниязов республикалық «Абай тағылымы – Тәуелсіздіктің тірегі» атты ақындар айтысының ақтық мәресінде жеңіске жеткен болатын. Талай дарынды ақындардың арасынан оқ бойы озық шыққан жерлес ақынымыз дүбірлі додадан олжалы қайтып, үшінші мәрте «Алтын домбыра» иесі атанды. Осылайша түрлі аламан бәйгеде суырып салма ақындығымен дараланып, орақ тілді, от ауызды сөз майталмандарын шаң қаптырған Мұхтар Мәуленұлы «Алтын домбыраны» мәңгілікке Сыр еліне қалдыруға қол жеткізді.
Бүгін айтыс өнерінің хас шебері киелі Арал өңіріне ат басын бұрып, аралдық ағайынның ыстық ықыласына бөленді. Осы орайда бүгін аудандық мәдениет үйінде «Айтыстың ақтаңгері – Мұхтар ақын» атты кездесу кеші өткізілді. Кездесу кешінде ақын иемденген «Алтын домбыра» киелі сахна төріне орналастырылды.
Кеште теңізді өлкенің өрендері ақынды арнайы жыр-шумақтарымен қарсы алып, жас айтыскер ақын Алмат Қойбағаров өзінің арнауын тарту кетті.
Тағылымды шарада сөз тізгінін ең алдымен аудан әкімі Мұхтар Оразбаев алып, Мұхтар Мәуленұлына ізгі лебізін білдірді.
- «Сіздің ұлттық өнер жолында туған жырларыңыз халық жүрегіне жетіп, елдің ыстық ықыласына бөленіп келе жатқанына куәміз. Ата-бабамыздан мұра болып қалған айтыс өнерінің қаймағын бұзбай, келешек ұрпаққа аманат етуде де қосар үлесіңіз зор. Сондықтанда сөз қадірін ұғынған Сіздей ардақты азаматты қашанда мақтан тұтамыз! Сізді барша аралдықтардың атынан үшінші мәрте дәстүрлі «Алтын домбыра» республикалық ақындар айтысының жеңімпазы атануыңызбен шын жүректен құттықтаймын!»,- дей келе халқымыздың ғасырдан-ғасырға жалғасып келе жатқан киелі айтыс өнерін құрметтеп, жаңғырту, кейінгі ұрпақтың санасына сіңіру баршамыздың міндетіміз екендігін ерекше атап өтті. Сонымен қатар дәстүрімізге сай ақынның иығына шапан жауып, арнайы құттықтау хатын табыс етті.
Ізгі лебіздер тізгінін одан әрі ҚР-ның еңбек сіңірген мәдениет қайраткері, Қазақстан Журналистер Одағының мүшесі, дербес зейнеткер Шәкірат Дәрмағамбетов, күйші - композитор, ақын-жырау, Қазақстанның еңбек сіңірген қайраткері, ҚР композиторлар Одағының мүшесі, Құрмет» орденінің және «Халық алғысы» медалінің иегері Мұрат Сыдықовтар жалғап, сахна төрінде аталық өсиеттерін ортаға салып, жеңімпаз ақынға ақ баталарын берді.
Ақынмен жүздесу шарасында айдынды Арал өлкесінің жас ақындары Шижағалық Ерасыл Сейтжан мен Шөмішкөлдік Ақылбек Бекболат Мұхтар ақынның өнері тақырыбында айтысып, кеш иесінің батасын алды.
Ғасырлар жемісі, ұлттық құндылығымызды дәріптеу мақсатында ұйымдастырылған шарада теңізді өлкенің төл өнерпаздары ән мен жырдан шашу шашты. Кеш соңында қатысушылар суырып салма ақынға сауалдарын жолдап, Арал туралы жырлау үшін ақыннан қонақ кәде сұрап, қолқа салды. Мұхтар ақын айбынды Арал туралы жүрекжарды жырын төкпелеп, арал жұртына деген ризашылығын жеткізді. Сонымен қатар ақындық жолға келуі мен шыңдалу жолы туралы ағынан жарылып, әсіресе, жас ұрпаққа елін, жерін сүйюді, ұлттық құндылықтарды көздің қарашығындай сақтап, насихатту жолында аянбай тер төгуге шақырды.
Арал ауданы әкімдігінің баспасөз қызметі
22 қаңтар 2021 ж. 112 0