Қалада жәрмеңке өткізілді

Ауданда орын алған қуаңшылық жағдайына байланысты мал азығының тұрақты келіп тұруы мен тұрғындарға қолжетімді болуын қамтамасыз ету мақсатындағы шаралар жалғасуда.

Бүгін Арал қаласындағы «Шанхай» мөлтек ауданындағы темір жол өткелінің маңында кезекті мал азығына қажетті жем-шөп сатылымы мен ауыл шаруашылығы өнімдерінің жəрмеңкесі ұйымдастырылды.

Тұрғындар игілігіне арналған шараға аудан әкімі Серік Сермағамбетов барып, бірнеше ауылдық округтің жәрмеңкеге әкелген бау-бақша, ет және сүт өнімдерін аралап көрді.

Сонымен қатар, Шиелі, Жаңақорған аудандарынан жеткізілген мал азығына қажетті жем-шөптің сатылымына куә болды. Аудан басшысы шараны ұйымдастырушыларға барлық ауылшаруашылығы өнімдері сатылымында баға тұрақтылығының сақталуын қадағалауды тапсырды.

Атап өтейік, Шиелі және Жаңақорған аудандарынан барлығы 7 автокөлікпен жеткізілген жоңышқа, пішен престері сатылымда болды.

Бұдан басқа, Сазды, Жіңішкеқұм, Қарақұм, Аққұм ауылдық округтерінің 800 кг ет өнімдері және 60 л шұбат Ақбай ауылының қауын-қарбыздары, Қаратерең ауылдық округінен әкелінген 300 кг балық өнімдері тұтынушыларға ұсынылды.