Парламент Мәжілісінің депутаты шыны зауыты жұмысымен танысты

Сыр бойына аймақтағы мәселемен танысу үшін Парламент Мәжілісінің депутаты Нұрлан Әуесбаев келді. Жалпы, Парламент құрамына өз тарихында алғаш рет Жалпыұлттық социал-демократиялық партия кірген болатын.

Алдымен Нұрлан Әуесбаев «Orda Glass Ltd» ЖШС – шыны зауытында болды. Қызылорда индустриалды аймағындағы шыны өндіру зауыты «Қазақстандықтардың әл-ауқатын арттыруға бағытталған орнықты экономикалық өсу» ұлттық жобасы аясында өткен жылдың қазан айында іске қосылған. Көпті күттірген жоба алдағы уақытта жемісін берері анық. Қазірдің өзінде 167 мың тоннаға жуық шыны өнімін өндірді.

Депутат Нұрлан Әуесбаев: «Шыны зауыты – осы аймақтағы ірі өндіріс орындарының бірі. Ондағы технологиялық процестердегі негізгі компоненттері осы жергілікті жерден шығады. Мысалы, кварц құм және шыны шығаруға қажетті құмның басқа да түрлері бар. Мұндағы жұмысшылардың құрамын алып қарасақ, қытай мен қазақтар тепе-теңдікте және ең жақсы тұсы – келісім мен инвестжобада қазақстандық жұмысшыларға технологияны қолдануды үйрету, оқыту, тәжірибе жинақтауға жағдай жасау мәселелері қарастырылған. Қарапайым жұмысшылардың да, инженерлердің де арасында қазақ азаматтарының саны басым екен. Бұл қуантады», – деп атап өтті.

syrboyi.kz