Тапсырмалар тиянақты орындалуы керек

Аймақ басшысы Нұрлыбек Нәлібаевтың тапсырмасына сәйкес, облыс әкімінің орынбасары Бахыт Жаханов Қызылорда қаласындағы бірқатар нысанның жұмыс барысын тексерді.

Алдымен «Жан Арай» ЖШС агроиндустриялық кешенінің жұмысын көрді. Аталған кешен күріш өндірісімен, күріш жармасын халықаралық стандарттар бойынша өңдеумен, түйіршіктелген жем өндірумен айналысады. Мекеменің жем зауытының қуаттылығы – тәулігіне 80 тонна, күріш өңдеу зауытының қуаттылығы – тәулігіне 150 тонна. Сондай-ақ, 1500 тонналық жеміс сақтау қоймасы, сыйымдылығы 1120 тонна тоңазытқыш бар. Ет өңдеу және жем зауытында 200 адам жұмыс істейді.

Қызылорда қаласындағы жаңа ЖЭО құрылысында жер қазу жұмыстары аяқталды. Мұнда 600-ге жуық адам және 60 техника жұмылдырылған. Жұмыс жоспарға сәйкес жүруде. Нысан 2025 жылы пайдалануға беріледі. Бүгінде инвестор «AKSA Energy» түрік компаниясы құрылысқа 70 млрд. теңгеден астам инвестиция салды.

Одан кейін облыс әкімінің орынбасары «Қорқыт ата әуежайына» кіреберіс автомобиль жолын қайта жаңғырту жұмысымен танысты. Мердігер «Қыран» ЖШС 13,5 шақырым жолды бір жылда салып бітіруді жоспарлаған. Төрт қабатты жол жабындысы төселген соң жарықшамдар мен аялдамалар орнатылуда. "Құрылыстың сапалы жүргізіліп, мерзімінде пайдалануға берілуін басты назарда ұстау керек", - деді Б.Жаханов.

Сонымен қатар, Сырдария өзенінің сол жағалауындағы "Жайлы мектеп" ұлттық жобасымен бой көтерген білім ордасының және жеті қабатты тұрғын үйлердің құрылыс барысы сараланды.

«Жайлы мектеп» ұлттық жобасымен облыста 12 300 орынға арналған 21 мектеп салу жоспарланған. Биыл 6 900 орындық 10 мектеп, алдағы жылы 5 400 орындық 11 мектеп пайдалануға беріледі. Облыс әкімдігі оларға инфрақұрылым жеткізуге жергілікті бюджеттен 118,4 млн. теңге бөліп, жоба-сметалық құжаттары әзірленді, сараптаманың оң қорытындысы алынды. Инфрақұрылым жүргізуге жергілікті бюджеттен 1,7 млрд. теңге бөлініп, қазір 10 мектептегі құрылыс-монтаж жұмыстары толық аяқталды. Биыл құрылысы басталатын 11 мектептің жер телімдері белгіленіп, «Самұрық - Қазына Констракшн» акционерлік қоғамына наурыз айында табысталды.

Осы аумақта 84 пәтерлік жеті қабатты 6 тұрғын үй құрылысы жүргізілуде. Облыс әкімінің орынбасары жұмысты уақытылы аяқтауды тапсырды.

Айта кету керек, өңірде соңғы 2 жылда 4 мыңға жуық пәтер табысталып,

17 мың тұрғынның баспана мәселесі шешілді. Биыл бюджеттен тұрғын үй құрылысына және жеке салушылардан дайын пәтерлер сатып алуға 34 млрд. 100 млн. теңге қаралды. Жыл қорытындысымен 2,5 мыңнан астам пәтер пайдалануға беріледі.

Сол жағалаудағы 350 орынға арналған заманауи үлгідегі Оқушылар сарайы «ҚазГерМұнай» компаниясының демеушілігімен салынуда. Нысан биыл ел игілігіне табысталмақ. Сондай-ақ, үстел теннисі орталығының құрылыс жұмыстары назардан тыс қалмады. Мұнда тұрғындарға сапалы қызмет көрсетіліп, ресми жарыстарды, оқу-жаттығу процестерін толық ұйымдастыруға мүмкіндік жасалады.