Құдіретті қалам иесі
Елді ер, толқынды жел қозғайтыны белгілі. Аралдан Алматыға дейін жол жүріп, «КІТАП және ҚАЛАМГЕР» атты республикалық ғылыми-практикалық конференцияға қатысып келдік.Алып Алатау бөктеріндегі ҚР Ұлттық кітапханасында өткен шара ҚР Мәдениет және ақпарат министрлігі және Қызылорда облысы әкімдігінің қолдауымен Қазақстан Жазушылар одағының 90 жылдығына, Халық жазушысы Әбдіжәміл Нұрпейісовтің туғанына 100 жыл толуына орай ұйымдастырылды.Басқосудың басты мақсаты – ұлт руханияты мен мәдениетінің қарашаңырағы – Одақ қызметін, жетістіктерін, Қазақстанның Еңбек Ері, Халық жазушысы Әбдіжәміл Нұрпейісовтің өмір жолын, шығармашылығын насихаттау болды.
Конференцияда Қазақстан Жазушылар одағының төрағасы Мереке Құлкенов, Ұлттық кітапхана директоры Бақытжамал Оспанова құттықтау сөз сөйледі. Оларға облыстық мәдениет, архивтер және құжаттама басқармасының басшысы Мира Қазбекова аймақ басшысы Нұрлыбек Нәлібаевтың арнайы алғысын жеткізді.
Іс-шара аясында Қазақстан Жазушылар одағының Кызылорда облысындағы өкілі Қаршыға Есімсейітова «Сыр елінде қазақ әдебиетінің бастау алуы» тақырыбында баяндама жасады.
Эколог-жазушы Сайлаубай Жұбатырұлы, жазушы, драматург Дулат Исабеков және жазушы, драматург Сұлтанәлі Балғабаев халық жазушысы Әбдіжәміл Нұрпейісовтің өмірі мен шығармашылығы жайында естеліктерден сыр шертті. Ал Аралдық адуынды ақын Толыбай Абылаев Әбеге арналған әсерлі өлеңін оқыды.Ұлттық кітапхана қорына Ә.Тәжібаев атындағы Қызылорда облыстық әмбебап ғылыми кітапханасы Сыр өңірі ақын-жазушыларының кітаптарын сыйға тартты.
Конференция қатысушылары «Жыр-әннің елі, Тұранның төрі – Сыр елі» атты Қазақстан Жазушылар одағының 90 жылдық тарихи кезеңдерін қамтитын, Қазақстанның Халық жазушысы Әбдіжәміл Нұрпейісовтің өмірі мен шығармашылығына арналған кітап және архив құжаттарының көрмесімен танысты. Ұлттық кітапхана қорынан ұйымдастырылған «Жазушылар одағының құрылғанына 90 жыл», қазақстандық фотожурналистиканың негізін қалаушылардың бірі, белгілі фототілші Сайлау Пернебаевтың архив қорынан алынған фотокөрмелерді көрді.Қазақ әдебиетінің классигі Әбдіжәміл Нұрпейісовтің 100 жылдығына арналған рухани-мәдени шаралар өңірімізде де, туған жерінде де өткізіледі.
«Толқын» ақпарат
