Халыққа қызмет – адалдық пен жауапкершіліктің айнасы

Қоғам игілігіне қызмет етуді өмірлік мақсатына айналдырған Асылхан Өмірзақұлы 1983 жылы Қызылорда облысы, Қазалы ауданы, Әйтеке би кентінде дүниеге келген.

2008 жылдың ақпан айында Қызылорда қаласындағы Халыққа қызмет көрсету орталығына маман ретінде жұмысқа орналасты. Ол кезде халыққа бар болғаны 20 мемлекеттік қызмет көрсетіліп, олардың барлығы қағаз түрінде және терезе арқылы қабылданатын. Уақыт өте келе цифрландырудың дамуы нәтижесінде eGov.kz электронды үкімет порталы іске қосылып, мемлекеттік қызмет көрсету процесі айтарлықтай өзгерді.

Асылхан Өмірзақұлы 17 жыл бойы халықпен тікелей жұмыс істеу барысында түрлі тағдыр иелерімен жолықты. Қарапайым азаматтардың кейде мемлекеттік қызмет атауларын шатастырып, қызықты жағдайларға тап болуы жұмысқа ерекше әсер берсе, кейбір азаматтардың өмірлік қиындықтары терең ойға қалдыратын сәттер де аз болған жоқ.

Осы жылдар ішінде заң саласында үлкен тәжірибе жинақтап, мемлекеттік қызмет көрсету жүйесінің қыр-сырына қанықты. Әрбір құжаттың артында жеке тағдыр жатқанын сезіне отырып, қызметін адал әрі мұқият атқаруды өмірлік қағидасына айналдырды.

Халыққа қызмет көрсету саласындағы 17 жылдық еңбек жолы үлкен өмір мектебі болды. Бұл жылдар ішінде мемлекеттік қызмет жүйесі айтарлықтай өзгерді – қағазбастылық азайып, цифрлық технологиялар кеңінен енгізілді. Дегенмен, өзгермейтін бір нәрсе бар – ол халықтың сеніміне ие болу және сапалы қызмет көрсету қағидаты.

Өз ісіне адалдықпен қарап, әрбір азаматтың мәселесін шешуге шынайы ықыласпен кірісу – мемлекеттік қызметкердің басты міндеті. Бұл жолдағы ең үлкен марапат – халықтың алғысы мен ризашылығы.