Баға білсең төл өседі, еңбек етіп ер өседі

Президент Қасым-Жомарт Тоқаев Қызылорда облысына келген жұмыс сапарында ауыл шаруашылығы тауарларын өндірушілермен әңгімелесіп, «Ауыл шаруашылығы – әлеуеті өте зор, стратегиялық маңызды сала. Бұл саладағы мәселелерді жақсы білеміз. Мемлекет оларды шешудің барлық мүмкіндіктерін қарастырады» дей келе, саланы өркендетудің басты бағыттарын атап көрсеткен болатын.Міне, биыл да маусым айында Қызылорда облысында өткізілетін дәстүрлі малшылар слеті жылдағыдай Жаңақорған ауданы аумағындағы Қаратаудың баурайында болады деп жоспарлануда. Малшылар слетінің негізгі мақсаты – төрт түлікті түлетіп жүрген шаруа иелерінің жаңа заман талаптарына бейімделе отырып, осы кәсіпті кеңейтіп, оны одан әрі дамытудың жолдары туралы пікір алмасу.«Жыл бойына жаздың ыстығына, қыстың суығына қарамастан төрт түлік малды өсірумен айналысып жүрген шаруалардың еңбегі орасан зор»,–дейді Қызылорда облыстық ауыл шаруашылық басқармасы басшысының орынбасары Сейілбек Нұрымбетов.
Облыстық малшылар слетіне ҚР Ауыл шаруашылығы министрлігінің, ауыл шаруашылығы қызметкерлерінің салалық кәсіптік одағының, «ҚазАгро» Ұлттық басқарушы холдингінің өкілдері, республикамыздың белгілі ғалымдары, төрт түлік малдың республикалық палаталары, жабдықтаушы кәсіпорындар қатысып келеді.         

Қызылорда облысында өткізіліп жүрген малшылар сле­тінің жылдан-жылға маңыздылығы артып, қатысушылардың қа­тары көбеюде. Былтырғы жылы малшылар слетіне Қызылорда облысын қосқанда 7 өңір өкілдері, нақты айтқанда, Атырау, Ақтөбе, Батыс Қазақстан, Жамбыл, Қарағанды, Түркістан облыстарының делегациялары қатысып, пікір алмасты. Биыл аймақтағы дәстүрге айналған облыстық малшылар слетіне республиканың барлық облысының делегаттары шақырылуда. Алқалы жиында «Мал шаруашылығын дамытудың өзекті мәселелері туралы» ғылыми конференция және мал шаруашылығы саласы бойынша көрме ұйымдастыру жоспарлануда.
«Толқын» ақпарат