АРАЛ АУДАНЫНДА ЖАҢА СОТ ТӨРАҒАСЫ ТАҒАЙЫНДАЛДЫ
Бүгін Арал аудандық сотына жаңа төраға сайланды. Жаңа сот төрағасын аудан активіне таныстыру үшін Қызылорда облыстық сотының судьясы Ермек Тұрбаев арнайы іссапармен келді. Аудан активімен болған жиынға аудан әкімі Мұхтар Оразбаев, аудандық соттың судьясы Нұржан Бекетаев және Арал аудандық сотының жаңадан тағайындалған төрағасы Камшат Садуақасова қатысты.Жиында алғашқы болып сөз алған аудан әкімі сот билігіне деген жауапкершілік күн санап арта түскенін тілге тиек ете келе, бүгінгі жиналған актив отырысында аудандық сотта бірқатар кадрлық өзгерістердің орын алғандығын жеткізді.Одан әрі, Қызылорда облыстық сотының судьясы Е.Тұрбаев Арал аудандық сотының жаңа төрағалығына Садуақасова Камшат Ашимқызы және аудандық соттың жаңа судьясы болып Бертай Серік Мұратбайұлы тағайындалғанын атап өтіп, жаңа төрағаның өмірбаянына тоқталып өтті.Тиісінше аудан басшысы М.Оразбаев осы уақытқа дейін аудандық сотының төрағасы қызметін атқарып келген азаматтардың ел игілігі жолындағы еселі еңбегіне алғысын жеткізе келе, жаңа тағайындалған сот төрағасын лауазымымен құттықтап, жұмысына табыс тіледі.
Сонымен қатар, аудан ативі атынан сөз алған мемлекет және қоғам қайраткері, Қызылорда облысы мен Арал ауданының құрметті азаматы Құдайберген Саржанов та бұған дейін аудандық соттың төрағасы қызметін атқарып келген төрағаларға ризашылық білдіріп, қызметіне кіріскен жаңа сот төрағасы К.Садуақасованы аудан жұртшылығы атынан құттықтап, өз ұсынысын жеткізді.
