Толқын Арал аудандық қоғамдық-саяси газет
» » » Көпке қамқор қор

Көпке қамқор қор

Тартысқа толы тағдыр тоғысында талай жанның тұрмыстық тауқыметті көріп келе жатқаны жасырын емес. Өмір болған соң бірде бар, бірде жоқ болатын дүниеге ешкім нақты кесіп үкім шығара алмасы да анық. Қазіргі уақытта ауданымызда әлеуметтік жағдайы төмен, жалғызбасты аналар мен көп балалы отбасылар бар. Денсаулық жағдайына байланысты еңбекке жарамсыз жандар қаншама?! Міне, қоғамдағы осындай жағдайдағы отбасыларға сәл де болса қол ұшын созып, олардың бір сәттік қажеттіліктерін өтеуде көптің алғысына бөленіп келе жатқан ұйымдар мен қоғамдық қорлар бар. Солардың бірі – өткен жылы құрылған «Арал Мейірімі» қоғамдық қоры.Бүгінде бұл қор біз жоғарыда айтып өткен әлеуметтік аз қамтылған, асырушысынан айрылған, жалғызбасты және көпбалалы аналарға, қариялар мен денсаулығында кінәраты бар мүмкіндігі шектеулі балаларға шама-шарқынша жәрдем беруде. Арнайы сауда орындарына садақа жәшіктерін орнатып, садақадан жиналған қаржыны әлгіндей жандардың қажетіне бағыттап келе жатқан бұл қор азғантай уақыттың ішінде көптің алғысын алып үлгерді. Сондай-ақ бұл топтың бірнеше мүшелері мен еріктілері бар. Олар халықтың балалары. Халық үшін қызмет етіп, жанашыр болып жүрген жастар. Қордың осындай мақтаныштары ертең елдің нағыз балашағы боларына көзіміз анық жетеді.
Иә, жұмыстар жасалды. Әлі де жасалу үстінде. Бұл қоғамдық қор баспанасызға баспана алып бермесе де жыртығын жамауға жағдай келмеген кейбір жанұяға көмек көрсетуге, қоғамдық орындардағы түрлі шараларға да мейілінше атсалысып келеді. «Алланың жолында не жұмсасаңдар да, Алла тағала міндетті түрде оның орнын толтырады» делінген ғой қасиетті Құранда. Бұл тұрғыда қоғамдық қор тарапынан көмекке келіп жүрген жастар қауымына елдің ризашылығы шексіз.
Шарбану есімді қала тұрғыны бүгінде 6 баланың анасы. Көп балалы ана сол перзенттеріне қараумен ақ жұмысқа шыға алмайтынын, мекетеп жасындағы баласының қыстық киімі болмай тұрғанын айтып «Арал Мейірімі» қоғамдық қорынан көмек сұраған жандардың бірі. Әрқашан көмекке әзір «Арзан» сауда үйі өз қаражаты есебінен қыстық кімін алып берді. Алдағы уақытта осындай жандар қоғамдық қор назарынан тыс қалмақ емес. Балалары үшін бәйек болатын ана жүрегі бұл сәтте бір толқығаны анық қой. Өзінің риясыз пейілін көрсетіп, көмекке келген жандарға алғаусыз алғысын білдірді.
Біз мұндай мәселелерге қор құрылғаннан бастап атсалысып келеміз. Көп жерлерде көмекке мұқтаж жандардың алғысын алып жатамыз. Алдымызда 1 наурыз – Алғыс айту күні келе жатқанын ескеріп, біз де өз тарапымыздан біздің жұмысымыздың жүруіне аз да болса үлестерін қосып келе жатқан көптеген жанашыр азаматтарға өз алғысымызды білдіргіміз келеді. Бір мақсат, бір мүдде жолында еңбек етіп келе жатқан барлық белсенділерге, ерікті жастар мен демеуші азаматтарға Алланың нұры жаусын дейімз. Мереке қарсаңына орай әрбір жанұяға амандық, дендеріне саулық тілейіміз.
З.Нұрбаева,
еріктілер тобының мүшесі.
26 ақпан 2019 ж. 288 0