Әлемді бағындырған Әлім

Қазақстандық музыкант Англияның Лидс қаласында өткен беделді байқауда бас жүлде жеңіп алды. 23 жастағы пианист Әлім Бейсембаев үш жылда бір рет ұйымдастырылатын және талай таланттарға қанат бітірген халықаралық өнер додасында алтын медаль қанжығалады.

Медальдан бөлек Әлім Бейсембаев 25 мың стерлинг фунты көлеміндегі ақшалай сыйлыққа ие болды және ең бастысы Warner Classics музыкалық лейблымен келісім-шартқа отырды.

Әлім фортепианода 5 жасынан ойнайды. Күләш Байсейітова атындағы музыкалық мектепте, Жәния Әубәкірова және Мәскеудегі Чайковский атындағы консерватория жанындағы мектепте оқыған. 12 жасынан бастап, Англиядағы жас музыканттарға арналған Перселла мектебінде, 18 жастан Музыкалық Корольдік академиясында атақты педагог Тесса Николсонның қолында тегін білім алған.Әлім қазір Лондондағы Корольдік музыкалық колледжде магистратурада оқиды. Қазақстандық өнерпазға деген сұраныс өте жоғары. Ірі концерттер беріп, еуропалық көрерменнің ыстық ықыласына бөленіп жүр. Ол туралы шетелдік басылымдар да жарысып жазып жатыр. Әлім әлемдік турға шыққан уақытында туған жерінде де өнер көрсетуді армандайды.

"Толқын" ақпарат