Жапонияда күріш тапшы болып тұр

Жапонияда күріш тапшылығына байланысты алаңдаушылық артып келеді. Супермаркет сөрелері сұраныстың артуынан босап жатыр, деп хабарлайды Kyodo News.

Метеорологиялық басқарманың Нанкай жарығында болуы мүмкін «мега жер сілкінісі» туралы ескерткеннен кейін кейбір тұрғындар күріш қорын жинай бастады. Қазір нарыққа жаңа күріш өнімі шығып жатыр. Елдің Ауыл шаруашылығы министрлігі тапшылықтың жойылатынына сендіріп, сабырға шақырды.

Токиода бір әйел күріш сөрелерінің бос тұрғанына таңғалса, үй шаруасындағы тағы бір әйел: «Күріш – негізгі тағам, бірақ оны сатып алу қиын. Бұл алаңдатады» деді.

Ito-Yokado ірі супермаркеттер желісі күріш сатуды әр үйге бір тауармен шектеді. Желі өкілі жаңа өнім шыққанша күту керектігін атап өтті. Аомори префектурасының фермері жоғары температура күріштің өсуін тездететінін және тайфунның әсерінсіз жағдай жақсы екенін хабарлады.

Күріш бағасы шілде айында өткен жылмен салыстырғанда 18,0%-ға өсті. Бұл – 20 жылдағы ең үлкен өсім.

Ақпарат көзі: kaz.inform.kz
Сурет: ашық дереккөз