Ұлыбританияда виртуалды әжей телефон алаяқтарымен күрес жүргізіп жатыр

Виртуалды әжей телефон алаяқтарымен ұзақ сөйлесіп, олардың уақыты мен ресурстарын босқа кетіреді.

Телефон алаяқтары жеке ақпарат пен ақшаны ұрлау үшін психологиялық айла-амалдарды қолданып, барған сайын жетілдіріліп келеді. Осы қауіпке жауап ретінде британдық O2 телекоммуникациялық компаниясы егде жастағы әйелдің сөйлегенін келтіріп, қаскүнемдерді әдейі жаңылыстыратын, уақытын босқа өткізуге мәжбүрлейтін «Дейзи» атты жасанды интеллект жасап шығарды.

«Дейзи» алаяқтардың қоңырауларын жылдам тану және жауап беру үшін жасанды интеллекттің бірнеше моделін біріктіріп отыр. Телефон арқылы әңгімелесудің жоғары шынайылығының арқасында ЖИ қаскүнемдерді желіде 40 минутқа дейін ұстайды. Қараша айында іске қосылғаннан бері жүйе 1000-нан астам күдікті қоңырауларды өңдеп, алаяқтар пайдаланатын негізгі стратегияларды анықтады.

Телефон алаяқтығының негізгі схемалары 

«Дейзидің» жұмысын талдау қаскүнемдер әдетте алдын ала дайындалған сценарийлерді пайдалана отырып, ұйымдасқан байланыс орталықтарынан әрекет ететінін көрсетті. Олар жан-жақты дайындықтан өткен, әлеуметтік инженерия әдістерін пайдаланады және шабуылдарының тиімділігін арттыру үшін сәтті тактикалармен бөліседі. 

Кең таралған әдістердің бірі – жеке ақпаратты ұсыну талабымен танымал тауарларды төмендетілген бағамен сатып алу ұсынысы. Егер жәбірленушінің күмәні болса, алаяқтар өз стратегиясын тез бейімдейді және қажет болған жағдайда қысымды күшейту үшін неғұрлым құзыретті әріптесі – «аға менеджер» немесе «супервайзермен» сөйлестіреді. 

Қылмыскерлер өздерін көбінесе банктердің, ірі компаниялардың, курьерлік қызметтердің немесе мемлекеттік органдардың қызметкерлері ретінде таныстырады. Белгілі брендтерді пайдалану жәбірленушінің сенімін арттырады. Сенімді қарым-қатынас орнағаннан кейін олар психологиялық қысым көрсету әдістеріне көшеді: банктегі шотты бұғаттау, қаражат жоғалту, компьютерді бұзу немесе соттық қудалаумен қорқытады, бұл адамды асығыс шешім қабылдауға мәжбүр етеді.

Телефон алаяқтарын қалай тануға болады?

Алдаудың негізгі индикаторларының бірі – әңгімелесушінің мінез-құлқының өзгеруі. Бастапқыда алаяқ мейірімді болып көрінеді, бірақ әңгіме жоспарға сай жүрмесе, ол ашушаң, тіпті агрессивті болып кетеді. «Дейзидің» жұмысы қылмыскерлер құрбаны нұсқауларын орындамаса немесе басқа тақырыптарға алаңдаса, сабырлық жоғалтатынын көрсетті.

Белгісіз нөмірлерден қоңырау шалу, жеке ақпарат беруді сұрау, қоқан-лоққы мен қысым алаяқтыққа тән белгілер екенін есте ұстаған жөн. Басқа адам қаншалықты сенімді болып көрінгенімен, әрқашан сақтық таныту керек. Күдік туындаған жағдайда әңгімені аяқтап, ұйымның ресми нөміріне хабарласуға кеңес беріледі.

Ақпарат көзі: kaz.inform.kz
Сурет: Нұрболат Нұржаубай