Аралдың қысы керемет
Табиғатта қыстан артық суретші мезгіл жоқ шығар сірә?! Әрине әр мезгілдің табиғатқа салар өзіндік ою-өрнегі болады. Десе де жазық даланы ақ көрпеге орап, ақшағыл бұлттар іспетті әсем ғимараттарға көмкерілген ақшақарлар дәл қазіргі уақытта қалаға ерекше сән беріп тұр. Соңғы 2-3 күндікте үсті-үстіне жауған ақ жауын бүгінде жер біткенді Алясканың әсем табиғатымен теңестіріп қойғандай. Әсіресе тал біткенге тамаша көрік берген аязды күннің бүгінгі сәті тұнып тұрған сурет. Дәл мұндай теңдессіз дүниені фотоаппараттар сол күйі алмаса, адам қолынан сала қою келе қоймас.
Мұндай сәттер жиі қайталана бермейді. Тік өскен талдардың еңсесін төмен тартып, темір қоршаулар мен ішекше созылған электр желілерін ерекше үйлесімге келтірген аяздың әрі дәлі қазіргі уақытта Арал қаласын бояуы қанық бейне суреттерге бай әсем өлкеге айналдырды. Бала біткеннің барлығы ерекше шаттанып, ақ ұлпа қардың үстінде алаңсыз асыр салуда. Аққала тұрғызып, қыс мезгілінің әрбір сәтін ерекше өткізіп жатқан балалар қаншама?! Жер ананың ерекше көркін кіргізіп, тылсым табиғаттың тамаша көрінісіне айналған көрікті қыстың осындай сәтін көрген де арманда, көрмеген де арманда. Қыс мезгілінің кереметі осында шығар.
А.Қарасай.
