Шетелдік көліктерді тіркеу бойынша «Қауырт желі» іске қосылды

kyzylorda-news.kz ҚР Ішкі істер министрлігі Қазақстан азаматтарының шетелдерден сатып алған және еліміздің аумағына әкелген автокөліктерін тіркеу мәселелерін түсіндіру үшін «қауырт желі» телефон желісін іске қосты.
Аталған министрлік мәліметінше, Әкімшілік полиция комитетінің қызметкерлері қазақстандықтарға 8 (7172) 71 58 21, 71 58 39, 71 58 04, 71 58 06, 71 58 62 (демалыс күндерін қоспағанда түскі үзіліссіз 09:00-ден 19:00-ге дейін) телефондары бойынша кеңес беруге дайын.
Сонымен бірге, 17-18 қаңтарда еліміздегі барлық өңірлік полиция бөліністері кезекті республикалық «Жолда қабылдау» акциясын өткізеді. Азаматтарды мобильді жедел қабылдау пункттерінде ішкі істер органдарының мамандары әрбір адамның жеке жағдайына байланысты тіркеу тәртібін нақты түсіндіреді. Осындай кеңестерді полицияның фронт-кеңселерінен алуға болады.
«Жолда қабылдау» акциясы аясында және полиция фронт-кеңселерінде айыппұлдар туралы ақпараттар алуға, полиция көрсететін мемлекеттік қызметтер туралы білуге болады. Өздерінің кезек күттірмес сұрақтарын шешу үшін ешқандай бюрократтық кедергілерсіз тікелей әкімшілік, көші-қон және жергілікті полиция басшыларына жүгіне алады.
«Жолда қабылдау» акциясы өткізілетін орындардың мекенжайларын өңірлік Полиция департаменттерінің сайттарынан білуге болады.