Аралда Фронт-офис ақпараттық орталығы ашылды
Арал аудандық полиция бөлімінде фронт-офис ақпараттық орталығы ашылды. Енді ол бөлімге әлдебір шаруамен бара қалсаңыз сізді жарық әрі қолайлы бөлімде мекеме қызметкері жылы шыраймен қарсы алып, сұрауыңызға сай тиісті көмек көрсетіп, мамандармен жолықтыруға қолайлы жағдай жасайды. Мұндай бастама бүгінде еліміз бойынша басқа облыстарда да қолға алынып жатыр. Айта кету керек, өткен жылы Жол картасы бекітіліп, Елбасы Н.Ә.Назарбаев Ішкі істер органдарының жұмысын жандандыру, халықпен қарым-қатынасын күшейтуге байланысты 9 бағытта жұмыс жасауға нақты тапсырма берген болатын. Соның бір бағыты – фронт-офис орталығын ашу.Бүгінде облыс орталықтарынан соң аудандар арасында осы мәселені қолға алу арқылы азаматтардың полиция бөліміне деген сенімін арттырып, құқықтық сауаттылықтарын арттыру қолға алынып жатыр. Жақында ғана аудандық полиция бөлімінен ашылған фронт-офис орталығы нақты соның айғағы бола алады. Аталған ақпарат орталығының жұмысымен танысуға «Нұр Отан» партиясы аудандық филиалы төрағасының бірінші орынбасары Т.Қанатов, қала әкімінің орынбасары С.Мырзағазиев, аудан прокурорының орынбасары Ж.Еркінов және полиция бөлімінің ішкі құрамы жиналды. Бұл орталықтың жалпылама жұмысын таныстырған аудандық Полиция бөлімінің басшысы Н.Әбдіразақов жаңа жүйенің халыққа қолайлы жағдай жасауға толық мүмкіндік беретінін алға тартты.Еңселі ғимараттың кіре берісінен орын алған бұл орталыққа зат қоятын арнайы орындар мен полиция жұмысына байланысты ақпараттармен қамтамасыз етіп тұратын теледидар оранатылған. Ал, ең маңыздысы бірінші кірген азаматтарды бұрынғыдай қамалдай сезілетін темір тор мен қару асынған қызметкер емес жай ғана арнайы құрылғы қарсы алып, бір сигнал арқылы тексеруден өткізеді. Бұл қазіргі таңда еліміздегі оңтайлы жүйелердің бірі. Бұдан былай аудандағы Полиция бөлімі ғимаратындағы бұл ақпараттық орталық әрбір азаматқа жайлы қызмет көрсететін болады.
А.Бисенов.
