baq.kz ҚР бас санитарлық дәрігер Айжан Есмағамбетова Денсаулық сақтау министрлігінің Facebоок парақшасында өткен тікелей эфир барысында елімізде соңғы аптада сырқаттану деңгейі 8-5,5% аралығында болғанын айтты.

Сәуір айында біз төтенше жағдай кезінде өңірлердің тыныс-тіршілігіне жауапты болған медициналық қызметкерлер, медико-әлеуметтік мекемелерде тұрып жатқан адамдар, елде қауіпсіздік пен тәртіпті қамтамасыз еткен қарулы күштер құрылымдары мен әкімдік қызметкерлері арасында профилактикалық тестілеу жұмыстарын жүргіздік. Статистика бойынша сәуірде вирус жұқтырғандардың 52% профилактикалық тестілеу кезінде анықталған адамдарға тиесілі. 14%-ы сырттан келген. Дәл осы сәуірде сырттан келген вирус жұқтыру көрсеткіші өскенін байқадық. Бұған біздің елмен көршілес мемлекеттерде эпидемиологиялық жағдайдың ушығуы себеп.  11%-ы денсаулығының төмендеуіне байланысты медициналық ұйымдарға жүгінгендерге тиесілі, - деді ол.

Алайда, жекелеген аймақтардағы жағдай мәз емес. Көрсеткіш 0-40% аралығы. Бұл – ауыру деңгейінің әртүрлілігін көрсетеді. Сондықтан, карантин талаптарын әлі де қатаң сақтау керек, - деді ол.

Жұмысын қайта бастаған барлық мекемелер санитарлық-дезинфекциялық режимді қатаң сақтауы керек. Әр өңірде бұл талаптарды бақылаумен айналысатын жедел штаб бар. Штаб құрамындағы мониторингтік топ барлық мекемедегі санитарлық талаптардың сақталуын бақылауда ұстайды. Егер сақтық шаралары тиісті деңгейде орындалмаған жағдайда, мекеменің жұмысын тоқтатуға қатысты әкімшілік шара қолданылады. Себебі, мекемелердің ашылуы кезінде  санитарлық-дезинфекциялық режимнің, арақашықтықтың сақталуы, жеке қорғаныш заттарының болуы әлі де маңызды болып қала бермек, - деп түсіндірді спикер.