Өзбекстанда су қоймасы бөгетінің бұзылуы салдарынан Түркістан облысы Мақтаарал ауданының оннан астам елді мекенін су басты. Өзбекстан Түркістан облысының Мақтаарал ауданындағы барлық коллекторды тазалауға көмектеседі. Тек оларға шекарадан техникамен кіруге жағдай жасау керек. Бұл туралы облыс әкімі Өмірзақ Шөкеев мәлімдеді, деп хабарлайды sputniknews.kz тілшісі. 
"Кеше біз Өзбекстанға барып, орталық коллекторды аралап шықтық. Қауіпті деген жерлердің бәрін қарадық. Соның ішінде Қоғалы елді мекенінің маңынан тағы да қосымша каналдар ұйымдастыруды ұйғардық. Жағдай тұрақтанғаннан кейін олар өз техникасымен кіріп, біздің бүкіл коллекторды тазалауға көмектесетініне келісім алып келдік. Біз тек шекарадан өтуге мүмкіндік беруіміз керек", - деді Шөкеев үкімет отырысында.
Айтуынша, Мақтаарал ауданындағы елді мекендерге жерасты суы жақын орналасқан, сондықтан су ұзақ уақыт жатып қалуы мүмкін. 

"Сол себепті елді мекендердің айналасынан үлкен арықтар қазып, суды сорғыту үшін техника қажет болады. Осыған орай экология министрлігімен бірігіп, республика өңірлерінен мотопомпа, сорғыларды алдыру керек болады", - деді әкім үкімет басшысына. 

Қазір елді мекендерді су басуының алдын алу үшін Нұрлы жол, Өргебас, Ырысты, Жантақсай елді мекендерінде бөгет салынып, Мырзакент бағытында Фирдоуси елді мекені аумағында коллектор орнатылды. 
Бұдан бөлек, Мақтаарал ауданының аумағынан ағын суды тез арада шығару үшін Өзбекстан тарапынан Жетісай ауданы Қоғалы елді мекенінің маңынан Орталық Бетпақдала коллекторы арқылы автожол көпірін айналып өтетін канал қазылған. 
Өзбекстанда су қоймасы бөгетінің бұзылуы салдарынан Түркістан облысы Мақтаарал ауданының оннан астам елді мекенін су басты. 
14 елді мекеннен 31 606 тұрғын эвакуацияланды. Жеті елді мекенде су басу қаупі әлі жоғары. Ал Мырзакент және Ақжолда қауіп сейіліп, тұрғындар үйіне оралған.