«Аралтұз» зауытындағы мыңнан астам жұмысшының құқығы қорғалды
Қызылорда облысында «Аралтұз» акционерлік қоғамына қарасты зауыттағы мыңнан астам жұмысшының құқығы қорғалды, деп хабарлайды ҚазАқпарат тілшісі.Арал аудандық прокуратурасы мамандары «Аралтұз» АҚ жұмысшыларының еңбек құқығын сақталуы және жалпы экологиялық жағдайына талдау жасады. Талдау нәтижесінде көптеген заң бұзушылық анықталды. Зауытта барлығы 1000-нан астам жұмысшы еңбек етеді. Жалақының орташа мөлшері 70-75 мың теңге. Ал өзге де ұсталымдарды есепке алғанда, қызметкерлердің негізгі бөлігінің жалақысы 60 мың теңгеге жетпейді.
Еңбек ұжымымен кездесу барысында және жеке қабылдау өткізу кезінде негізгі талаптар бойынша жалақы мөлшерін арттыру және еңбек жағдайының қауіпсіздігін жақсарту жөнінде көмек көрсету сұралған болатын. Қолданыстағы заңнамаға сәйкес ұжымдық шартта немесе жұмыс берушінің актісінде жұмысшыларға еңбек жағдайының зияндылығы немесе қауіптілігі үшін жоғарылатылған мөлшерде жалақы белгіленеді. Бұған қоса, аталған санаттағы жұмысшыларға кемінде алты күнтізбелік күнге созылатын қосымша ақы төленетін жыл сайынғы еңбек демалысы берілуі тиіс.
«Алайда, көп жылдардан бері ұжымдық шартта (2014 жылғы) және жұмыс берушінің актісінде көрсетілген өндірістің ерекшелігіне қарамастан зиянды еңбек жағдайы үшін қосымша төлемдер және жыл сайынғы қосымша ақы төленетін еңбек демалыстары белгіленбеген. Сәйкесінше олар төленбеген және қосымша демалыс күндері берілмеген. Сондай-ақ, Қазақстан Республикасы Денсаулық сақтау және әлеуметтік даму Министрінің бұйрығына сәйкес әр бір ауысымға шыққан жұмысшыға белгіленген мөлшердегі сүт және оған теңестірілген тамақ өнімдерін беру жөніндегі талаптары орындалмаған. Прокурорлық қадағалау актісін қарау нәтижесімен АҚ-да жаңа ұжымдық шарт бекітіліп, онда жұмысшыларға зияндылығы үшін төленетін қосымша үстеме ақы бекітілді. Бұған қоса, жұмысшыларға емдік-профилактикалық мақсатында сүт өнімдерінің берілуіне және уақытысында арнайы киім-кешектердің табысталуына қол жеткізіліп, жалпы мыңдаған жұмысшылардың құқығы қорғалды», - деп мәлім етті Қызылорда облыстық прокуратурасы.
