Балада коронавирус белгілері байқалса не істеу қажет?
Алматы қалалық балалар клиникалық инфекциялық аурухананың бас дәрігері Ержан Сералин балада коронавирус инфекциясының белгілері байқалған кезде не істеу керек екенін айтты, деп хабарлайды sputniknews.kz.Егер температурасы түспейтін болса, медициналық көмекке жүгіну қажет. Ол жерде кеуде тұсы рентгенге түсіріліп, пневмонияның бар-жоғы анықталады.«Барлық ата-ана баланың тез жазылып шыққанын қалайды. Бұл да кез келген вирустық инфекция секілді өтеді. Ең бастысы ағзасына зиян келтіріп алмау керек. Балалар коронавирус инфекциясын жеңіл өткізетінін барлығы біледі. Ал балада дене қызуы болса, температураны түсіретін парацетамол беру қажет. Ешқайда шықпай, үйде оқшаулауда болып, жылы суды көп ішуі қажет»,– деді маман.
Егер үш күн бойы баланың температурасы түспейтін болса, дәрігер көмегіне жүгіну қажет.«Егер балада пневмония анықталса, баланы ауруханаға алып келу керек. Ауруханада әрі қарай қажетті ем жасалды. Балаларға вирусқа қарсы препараттар қолдануға болмайды. Клиникалық хаттамада да Covid-19 кезінде вирусқа қарсы дәрілер көрсетілмеген. Баланың дене қызуын түсіріп, сұйықтықты көп ішуі қажет. Одан басқа өзін-өзі емдеу ұсынылмайды»,– деп түсіндірді дәрігер.
Сондай-ақ, дәрігер дүниеге келгеніне он күн болған сәбидің коронавирустан жазылып шыққанын айтты.
«Сәби коронавирус инфекциясымен дүниеге келді. Ол перзентханадан бірден инфекциялық ауруханаға жеткізілді. Кеше анасы мен сәбиі ауруханадан шығарылды»,– деді Сералин.
