РЕЙДТІК ШАРАЛАР ЖАЛҒАСУДА

Қазіргі таңда аудандағы эпидемиологиялық ахуал тұрақты. Дегенмен, босаңсуға ешқандай негіз жоқ. Қызылорда облысының Бас мемлекеттік санитариялық дәрігерінің №24 қаулысына сәйкес әлі де халықтың көп шоғырлануына, тұрғын үй ауласында отбасылық жиын-тойларды өткізуге рұқсат етілген жоқ. Сонымен қатар, кәсіпкерлік нысандар мен қызмет көрсету орталықтары да шектеу уақытынан кейін жұмыс жасауына болмайды.

Карантин талаптарының сақталуын қадағалау мақсатында құрылған мобильді топ тұрақты түрде рейд шараларын жүргізіп келеді. Түнгі жүргізілген тексеріс шаралары барысында жұмысшы топ өкілдері көңіл көтеру және тамақтанатын орындарды, дүкендерді аралап сағат 23:00-ден кейін жұмысын тоқтату қажеттігін ескертіп, түсіндірме жұмыстарын жүргізді. Рейд шараларының нәтижесінде белгіленген уақыттан кейін жұмысын жалғастырған бір көңіл көтеру орны анықталып, тиісті хаттамалар толтырылды.