Қызылордада кірпіш зауытына үш қайтара ұрлыққа түскен күдіктілер ұсталды
Қызылорда қалалық полиция басқармасына қала тұрғынынан кірпіш зауытына белгісіз азаматтардың үш қайтара ұрлыққа түскені туралы арыз түсті.Олар кірпіш зауытының ауласында орналасқан қойма есігінің ілмелі құлпын бұзу арқылы ұрлыққа түсіп, бой тасалаған. Шығын 2 миллионнан астам.
Жедел топ дереу оқиға орнына жетіп, полиция қызметкерлері тексеру жүргізіп, зауыт қызметкерлерінен жауап алды. Күдіктілердің жеке басын анықтау үшін жедел-іздестіру шаралары жүргізілді.
Нәтижесінде 23 және 24 жастағы күдіктілер анықталып, ұсталды. Олар өз кінәсін толықтай мойындаған.
«Қазіргі таңда бұл дерек бойынша Қазақстан Республикасы Қылмыстық кодексінің 188 – бабының 3 – бөлігімен (Ұрлық) сотқа дейінгі тергеп – тексеру амалдары жүргізілуде. Күдіктілер уақытша ұстау изоляторына қамаққа алынды», -делінген полиция департаментінің хабарламасында.
