Аралда заңсыз жұмыс істеген казино қожайыны сотталды

Арал аудандық соты заңсыз ойын ұйымдастыруға қатысты қылмыстық істің үкімін шығарды. Бұл туралы Қаржы мониторингі комитетіне сілтеме жасап хабарлайды.ҚР ҚМ Қаржы мониторингі комитетінің Қызылорда облысы бойынша Экономикалық тергеу департаменті қызметкерлерімен анықталған бұл заңсыз ойын орны 2019 жылдың маусым айынан бастап жұмыс жасаған.

Арал ауданы Сексеуіл кентінің тұрғыны жалға алынған ғимаратта бір жыл көлемінде бірнеше онлайн казино бағдарламалары бойынша заңсыз ойындар ұйымдастырылған. Яғни, Қызылорда облысы бойынша сот сараптамалары институтының компьютерлер жадына жасалған сот-сараптамалық зерттеулері анықтағандай, Қазақстан Республикасы аумағында жоқ сайттар, интернет желісі арқылы онлайн казино бағдарламасына қосылуға мүмкіндік беретін сілтемелер, ойын орнында администратор, оператор болып жұмыс жасаған тұлғалардың телефон жазбалары барлық заңсыз әрекеттерді дәлелдеді.

Арал аудандық сотының үкімімен ҚР ҚК 307 бабы 1-б. қарастырылған қылмыстық әрекеттері үшін (ойын мекемесiн заңсыз ашу немесе заңсыз ұйымдастыру, құмар ойындарын ұйымдастыру және өткізу) заңсыз ойын ұйымдастырған азаматтың 1 жылға бас бостандығы шектелді. Сонымен қатар пробациялық бақылау мен 100 сағаттық мәжбүрлі еңбекке тарту тағайындалды.

Ойын орнынан алынған 5 компьютер құрылғыларымен, модем және кассада болған 42 мың теңге ақша мемлекет пайдасына тәркіленді.

Қызылорда облысы бойынша экономикалық тергеу департаментімен 2020 жыл басынан беру аталған бағыттағы қылмыстық істер бойынша 9 жүйелік блок, 75 монитор, 63 процессор, 3 телевизор, 6 модем және 9 ұялы телефон айналымнан алынды.

kyzylorda-news.kz